Turqia mbështet angazhimet për t’u arritur marrëveshja mes Kosovës dhe Serbisë

Turqia mbështet angazhimet për t’u arritur marrëveshja mes Kosovës dhe Serbisë

19 October 2018 20:25

Presidenti i Republikës së Kosovës, Hashim Thaçi ka pritur në takim ministrin e Punëve të Jashtme të Turqisë, Mevlüt Çavuşoğlu, me të cilin ka bashkëbiseduar për bashkëpunimin e gjithëmbarshëm ndërmjet dy shteteve.

Në takim, siç thuhet në komunikatën e presidencës, është biseduar edhe për mundësinë e rritjes së shkëmbimit tregtar ndërmjet dy vendeve, si një mundësi për dinamizmin e rritjes ekonomike.

Thaçi, thuhet tutje, ka theksuar se Kosova dhe Turqia kanë marrëdhënie miqësore dhe bashkëpunim strategjik dhe falënderoi për përkrahjen që Turqia i jep konsolidimit të shtetit të Kosovës në botë.

“Sot Turqia është një mbështetëse besnike e forcimit të subjektivitet ndërkombëtar të Kosovës, si në shtimin e njohjeve ashtu edhe në anëtarësimin në organizata ndërkombëtare”, ka thënë ai.

Sipas Thaçit, Kosova është mirënjohëse për mbështetjen e përhershme që merr nga Turqia në të gjitha fushat.

Duke folur për zhvillimet në rajon, Thaçi ka thënë se Kosova po kërkon të arrijë marrëveshje paqësore me Serbinë, që do të hap perspektivë evropiane për të dy vendet.

“Marrëveshja është në interes të të dyja vendeve”, ka shtuar ai.

Ministri i Punëve të Jashtme të Turqisë, Mevlüt Çavuşoğlu ka thënë se Turqia mbështet përpjekjet për paqe të qëndrueshme në rajon e në këtë kuadër edhe angazhimin për të arritur një marrëveshje ndërmjet Kosovës dhe Serbisë.

“Do të vazhdojmë të përkrahim në çdo aspekt, shtetin dhe popullin e Kosovës”, u shpreh Ministri Çavuşoğlu.

Në takim u bisedua edhe për zgjerimin e bashkëpunimit bilateral në sektorët e ekonomisë dhe atë të mbrojtjes e sigurisë.

© KOHA. Të gjitha të drejtat janë të rezervuara.

Komentet

Shto koment

Të ngjashme