Secila parti e përfaqësuar në Qeverinë e Kosovës që pritet të votohet të shtunën, do të ketë zëvendëskryeministër, pos AAK-së që do ta japë kryeministrin. Kjo do ta çojë në 5 numrin e zëvendëskryeministrave. Me gjasë nuk do të ketë fare ministër për dialog, e një tjetër ministri do të themelohet që ta drejtojë PDK-ja.
Një burim i sigurt brenda AKR-së, ka konfirmuar për portalin Koha.net se ndarja përfundimtare e posteve qeveritare do të jetë kësisoj.
Por duket se Ministria e Bujqësisë e udhëhequr nga Lista Serbe tashmë është punë e kryer. Pos dikasterit me buxhet mbi 60 milionë euro, Lista Serbe do të drejtojë edhe dy ministri të tjera, atë për Kthim e Komunitete si dhe Ministrinë e Administrimit të Pushtetit Lokal. Lista Serbe, që sot ka shkuar në Beograd për të u konsultuar nëse përfundimisht do ta votojë Ramush Haradinajn për kryeministër, do të ketë në qeveri edhe një post të zëvendësit të këtij të fundit.
PDK-ja do të ketë numrin më të madh të ministrive, gjashtë sosh, bashkë me një post të zëvendëskryeministrit. Për të pritet të krijohet një ministria, që do të quhet Ministria e Inovacionit dhe Ndërmarrësisë. Siç mëson Koha.net, PDK si pritej do të drejtojë edhe kuletën e shtetit, pra Ministrinë e Financave, pastaj Ministrinë e Shëndetësisë, Ministrinë e Kulturës, Rinisë dhe Sporteve, Ministrinë e Integrimeve, si dhe Ministrinë e Drejtësisë.
Posti i kryeministrit do ta lë AAK vetëm me dy ministri. AAK-ja do të udhëheq me MFSK-në dhe Ministrinë e Infrastrukturës.
E Nisma, pos një zëvendëskryeministri, do të ketë nën drejtim edhe tri ministri të tjera, atë të Punës dhe Mirëqenies Sociale, Ministrinë e Arsimit si dhe Ministrinë e Tregtisë dhe Industrisë.
Megjithëse u desh të heqë dorë nga dikasteri i Bujqësisë, AKR-ja e Behgjet Pacollit, do të mbetet me numër më të madh të ministrive se sa AAK-ja e Nisma, që ishin bashkë me PDK-në në koalicion parazgjedhor. AKR-së, pas tërheqjes së Korab Sejdiut i kanë mbetur vetëm tre deputetë, dyfish më pak se Nisma (6) e trefish më pak se AAK-ja (10). Partia e “Bacit” do të ketë zëvendëskryeministrin e parë, Ministrinë e Punëve të Jashtme, Ministrinë e Punëve të Brendshme, Ministrinë e Zhvillimit Ekonomik si dje Ministrinë e Mjedisit dhe Planifikimit Hapësinor.
Vota e mundshme e Teuta Rugovës bashkë me angazhimin për të bërë numrat për PAN-in, pritet ta kthejnë në Qeveri Dardan Gashin. Ai pritet të marrë post të zëvendëskryeministrit dhe atë të Ministrit të Diasporës, të cilës nga mandati i kaluar do t’i shtohet edhe një fushëveprim, ai Investime Strategjike.
Komunitetet jo serbe do të kenë po ashtu dy ministri atë të Ministrisë së Administratë Publike, dhe një tjetër pa portofol.