Tetë raste të dhunës në familje janë regjistruar për 24 orë në Policinë e Kosovës, katër prej të cilave në Prishtinë.
Sipas raportit të PK-së, një grua ka raportuar se në vazhdimësi ka pasur dhunë psikike nga bashkëshorti, me të cilin nuk bashkëjeton që disa muaj. I dyshuari pas arrestimit është dërguar në mbajtje.
Në një rast tjetër në Prishtinë, viktima ka raportuar se para disa kohe është kanosur nga ish-bashkëshorti dhe se ai posedonte armë në shtëpi.
“Njësitë policore me urdhër të prokurorit kanë bastisur shtëpinë e të dyshuarit, mirëpo nuk është gjetur asgjë e dyshuar. I dyshuari është arrestuar dhe me vendim të prokurorit është dërguar në mbajtje”, njoftoi PK.
Dhunë psikike e kanosje ka raportuar edhe një grua në Prishtinë nga bashkëshorti i saj, i cili po ashtu është dërguar në mbajtje. Ndërsa edhe një i dyshuar, bashkëshort, është arrestuar por është liruar në procedurë të rregullt pasi u raportua nga viktima për dhunë fizike.
Policia njoftoi tutje se në Gllogoc është arrestuar një i dyshuar për kanosje të bashkëshortes dhe është dërguar në mbajtje. E, në Obiliq një grua raportoi se bashkëshorti po i shkakton dhunë psikike. Policia nuk e ka hasur të dyshuarin në vendngjarje, ndërsa rastin po e heton.
Në Pejë, një grua ka raportuar të premten se ishte ndarë prej disa muajsh nga bashkëshorti dhe se procedura e shkurorëzimit është në proces gjyqësor, por se i dyshuari po i dërgon mesazh dhe ka frikë nga ai.
“Me 30.10.2026, është raportuar se viktima femër kosovare para disa muajve ishte ndarë nga bashkëshorti i saj me të cilin kanë dy fëmijë dhe se procedura e shkurorëzimit është në proces gjyqësor, por i dyshuari mashkull kosovar, vazhdon t’i dërgoj mesazh dhe se e njëjta ka frikë nga ai. I dyshuari është arrestuar dhe me vendim të prokurorit është dërguar në mbajtje”, thuhet në raportin e PK-së për rastin në Pejë.
E një rast dhune në familje u paraqit në stacionin në Malishevë ku u raportua për fjalosje mes nuses dhe vjehrrit. Pas intervistimit, të dy janë liruar në procedurë të rregullt.