Mulliqi: Sulmuesit e gazetarëve ndëshkohen kryesisht me gjobë
Drejtoresha ekzekutive në Asociacionin e Gazetarëve të Kosovës (AGK), Getoarbë Mulliqi, ka deklaruar se ndëshkimet për sulmet ndaj gazetarëve janë kryesisht me gjoba.
Sipas saj, ndëshkimet në përgjithësi nuk janë konform ligjit.
“E pamë edhe storien më herët që është gjobë prej 200 eurosh, apo gjobë prej 350 eurosh. E kemi edhe rastin e gazetarit Valon Syla, i cili është sulmuar në dhjetor të viti 2020 edhe sulmuesi i tij i cili e ka sulmuar fizikisht është dënuar gjithashtu me gjobë”, ka theksuar Mulliqi, në emisionin “Tempus” në KTV.
Sipas saj, nuk është vetëm ky problem që e hasin gazetarët.
Ajo ka deklaruar se AGK-ja ka bashkëpunim shumë të mirë me organet e drejtësisë.
Mulliqi është shprehur se në baza 6 mujore marrin të dhëna dhe se pas çdo sulmi ndaj gazetarëve janë në kontakt me Policinë e Kosovës.
“Të gjitha institucionet kanë koordinator për rastet e gazetarëve, mirëpo kjo nuk është e mjaftueshme sepse në Kosovë në vazhdimësi, sikur AGK-ja ashtu edhe organizatat e shoqërisë civile edhe ekspertët e meidas, ne kemi kërkuar që të krijohet një trup koordinues”, ka theksuar Mulliqi.
