-
Превео: Флутура Гасхи-Мехмети
- 2. новембар 2026. 16:15
- Учешће у:
Irani ka thënë të hënën se Ngushtica e Hormuzit do të rihapet brenda dy ditësh, nëse Shtetet e Bashkuara pranojnë kërkesat e tij.
“Baza për negociatat mes Iranit dhe Shteteve të Bashkuara, përmes ndërmjetësuesve, mbetet plani shtatëpikësh i Iranit, i cili tashmë është përmbledhur në mënyrë që të mund të zbatohet brenda dy ditësh”, ka deklaruar zëdhënësi i ministrisë së Jashtme iraniane, Esmail Baghaei.
“Kjo dëshmon edhe një herë qasjen e Iranit me vullnet të mirë. Siç kemi deklaruar tashmë, nëse kërkesat e Iranit plotësohen, siguria në Ngushticën e Hormuzit mund të rikthehet dhe procesi i negociatave mund të nisë brenda një periudhe të shkurtër”, ka shtuar Baghaei.
Më herët, Irani kishte deklaruar se kjo periudhë do të ishte shtatë ditë.
Ndërprerja e qarkullimit në ngushticë nga ana e Iranit, përmes së cilës para luftës kalonte një e pesta e naftës dhe gazit të tregtuar në botë, është shndërruar në instrumentin kryesor të presionit të Teheranit zyrtar.
Pasojat janë ndier përtej Lindjes së Mesme dhe i kanë shkaktuar probleme politike presidentit Donald Trump dhe partisë së tij Republikane, në prag të zgjedhjeve të mesmandatit për Kongresin amerikan.
Baghaei ka reaguar gjithashtu ndaj kërcënimeve të përsëritura të presidentit amerikan, Donald Trump, se Shtetet e Bashkuara mund të shkatërrojnë shpejt një objekt bërthamor shumë të fortifikuar, të vendosur nëntokë, në pjesën qendrore të Iranit.
Objekti, i njohur si Kuh-e Kolang Gaz La, ose “Mali i Kazmës”, ndodhet në anën jugore të kompleksit bërthamor të pasurimit të uraniumit në Natanz, i cili u bombardua nga Shtetet e Bashkuara gjatë operacionit “Midnight Hammer”, në luftën 12-ditore mes Iranit dhe Izraelit në vitin 2025.
Megjithatë, Mali i Kazmës ka mbetur i paprekur, ndërsa Irani vazhdon punimet për gërmimin dhe zgjerimin e objektit.
“Çdo sulm ndaj Iranit, çdo akt agresioni ushtarak kundër Iranit, pavarësisht mjeteve që përdoren, do të përballet me një përgjigje të fuqishme, të menjëhershme dhe gjithëpërfshirëse nga ana jonë”, ka thënë Baghaei.