Бразилскиот претседател реизбран за четврти мандат, победи над сојузникот на Трамп

Presidenti brazilian, Luiz Inacio Lula da Silva, është rizgjedhur të dielën për një mandat të katërt historik, por rivali i tij i mundur dhe aleati i Trumpit, senatori Flavio Bolsonaro, ka thënë se nuk do ta pranojë rezultatin dhe se do ta kundërshtojë atë në rrugë ligjore.

Udhëheqësi 80-vjeçar i së majtës ka fituar më shumë se 51 për qind të votave, duke siguruar fitoren në rundin e dytë. Kjo fitore bie ndesh me zhvendosjen më të gjerë politike drejt së djathtës në të gjithë Amerikën Latine dhe vjen pas një fushate të dominuar nga shqetësimet për koston e jetesës, kriminalitetin dhe korrupsionin.

Bolsonaro, i cili ka mbetur prapa Lulës me rreth 4.4 milionë vota, ka thënë se ekipi i tij do ta kundërshtonte rezultatin pas vendimit të minutës së fundit të Gjykatës së Lartë për ta zgjatur votimin me dy orë.

“Është e pamundur ta njohim rezultatin e zgjedhjeve, duke pasur parasysh mënyrën se si u zhvilluan këto ngjarje”, u ka thënë Bolsonaro mbështetësve në kryeqytetin Brasilia, pasi është shpallur fitorja e Lulës.

“Do të ndërmarrim veprime ligjore. Do të kërkojmë anulimin e këtyre zgjedhjeve”, ka shtuar ai.
Këto zgjedhje shënojnë herën e parë që nga rikthimi i zgjedhjeve të drejtpërdrejta presidenciale në vitin 1989 që një kandidat fiton presidencën pasi është renditur i dyti në rundin e parë.

“Ju siguroj se do ta ndryshojmë mënyrën se si qeverisim këtë vend. Do t’u japim njerëzve një rol më të madh në vendimmarrjen tonë”, ka thënë Lula pas rizgjedhjes.

Lula ka falënderuar popullin brazilian për “bujarinë” e tij, veçanërisht të rinjtë e vendit, të cilët “dolën në rrugë për të mbrojtur demokracinë”.

Fitorja e Lulës është një goditje e madhe për lëvizjen politike të Bolsonaro-s, pasi Flavio nuk arriti të bënte atë që as babai i tij, ish-presidenti i burgosur Jair Bolsonaro, nuk mundi ta bënte në vitin 2022: ta mposhtte Lulën në kutitë e votimit.

Megjithatë, rezultatet u shpallën pas një dite të trazuar zgjedhore, gjatë së cilës votimi u zgjat me dy orë, pas kërkesave të minutës së fundit nga të dy kandidatët drejtuar autoriteteve zgjedhore.

Gjykatësi i Gjykatës së Lartë të Brazilit, Cristiano Zanin, ka miratuar kërkesën e ekipit të Lulës, e cila kërkoi zgjatjen e orarit të votimit duke përmendur “incidente” që kishin prekur autobusët që transportojnë votuesit drejt qendrave të votimit në disa shtete.

Edhe ekipi i Bolsonaro-s kishte kërkuar zgjatjen e votimit në disa zona, duke përmendur vështirësitë me të cilat ishin përballur votuesit për të arritur në qendrat e votimit për shkak të reshjeve të dendura të shiut.