Elon Musk u ka dhënë admiruese të Teslas një pamje nga afër të projektit më të ri dhe ndoshta më ambicioz të prodhuesit të automjeteve elektrike: Tesla Roadsterin e shumëpritur.
“Na duhet një publik për të vërtetuar se nuk është inteligjencë artificiale”, u tha Musk të pranishmëve gjatë aktivitetit të transmetuar drejtpërdrejt. “Kështu që, ju mund t’u tregoni të tjerëve se e keni parë me sytë tuaj. Sepse atë që do të shihni me sytë tuaj, nuk do ta besoni”.
Në një demonstrim spektakolar, Roadsteri - vetura e vetme e Teslas që drejtohet manualisht - u ngjit në një rampë të lartë dhe të lakuar, duke u kthyer përmbys, përpara se të lëshohej nga skaji i saj, të kryente një rrotullim në ajër dhe të ulej sërish në tokë në mënyrë të sigurt, mes brohoritjeve të publikut. “Epo, funksionoi”, tha Musk.
Sipas Lars Moravyt, zëvendëspresidentit të Teslas për inxhinierinë e automjeteve, Roadsteri përdor një “sistem thithjeje me ventilator” në pjesën e poshtme të automjetit, i cili, sipas tij, mund të krijojë forcë që e bënë të mundshme që makina të lëvizë përmbys.
Musk shtoi se Roadsteri mund të kryejë rrotullime dhe manovra “të çmendura” akrobatike, duke thënë se kjo “nuk është domosdoshmërisht një veturë e projektuar duke pasur sigurinë si përparësi”.
Një demonstrim i dytë tregoi veturën që u drejtua drejt një vargu automjetesh të tjera Tesla, përpara se të ngrihej në ajër dhe të kryente një manovër të ngjashme me një “kickflip”, duke kaluar sipër tyre.
Sipas faqes zyrtare të Teslas, kompania tashmë po pranon rezervime për automjetin, i cili ofrohet në tri versione: Performance, Thrust dhe Rocket.
ВИДЕО: