Kryeministri i Shqipërisë, Edi Rama, ka thënë se disa shqiptarë e kanë ndjerë të nevojshme ta prisnin në atë mënyrë dhe se kjo nuk paraqet problem, pasi, sipas tij, kjo është demokracia. Rama e bëri këtë deklaratë duke komentuar incidentin kur u godit me vezë nga disa shqiptarë pasi mbërriti në Dublin të Irlandës.
Rama ndodhet në Dublin, ku po merr pjesë në Samitin e 9-të të Komunitetit Politik Evropian (EPC). Gjatë një komunikimi me media, ai është pyetur për pritjen që iu bë nga disa shqiptarë, të cilët e qëlluan me vezë.
“Mendoj se ky është një shtet demokratik, udhëhiqet nga rregulla dhe ligje dhe çfarë ndodhi është pjesë e të qenit një shtet demokratik dhe, në të njëjtën kohë, ka të bëjë me rregullat dhe ligjet. Në Irlandë ndihem shumë i mirëpritur. Pata një bisedë shumë të mirë dje në një grupim prestigjioz mendimesh dhe kishte dhjetëra vëllezër e motra shqiptarë që ndjenë se duhet të më mirëpritnin në një mënyrë ndryshe dhe kaq. Është demokraci, çfarë të bësh”, ka thënë Rama.
ВИДЕО:
Albanian Diaspora Protests Against Edi Rama During His Visit to Dublin, Chanting “Rama Go!” https://t.co/Xu8BtN7yS2 https://t.co/ELbBfqEFZG
— Oculus News (@Oculusnews) Ноември 11, 2026
Rreth 50 liderë ndërkombëtarë po marrin pjesë në takimin e Komunitetit Politik Evropian në Qendrën e Konventave në Dublin. Irlanda mban presidencën e Këshillit të Bashkimit Evropian deri në fund të vitit, ndërsa këtë javë në Dublin po zhvillohen dy prej ngjarjeve kryesore të saj: Samiti i Komunitetit Politik Evropian dhe takimi joformal i Këshillit Evropian.
Në takimet e kësaj jave pritet të diskutohen tema si lufta në Ukrainë, inteligjenca artificiale dhe kërcënimet hibride në Evropë. Diskutimet për inteligjencën artificiale do të jenë ndër temat e para të këtij lloji mes liderëve të BE-së.
Komuniteti Politik Evropian është një forum joformal ku liderët evropianë diskutojnë çështje politike dhe strategjike me interes të përbashkët. Ai u krijua në vitin 2022, pas pushtimit rus të Ukrainës, dhe zhvillon takime dy herë në vit. Tema e samitit në Dublin është “Evropa – e fortë, e sigurt dhe e lidhur”.