Arbnora Fejza nga Skenderaj thyen rekord në Guinness Foto: Ilustrim

Arbnora Fejza nga Skenderaj thyen rekord në Guinness

15 December 2018 16:23

Emri i Kosovës edhe një herë u përmend në librin e famshëm të rekordeve Guinness.

Është Arbnora Fejza Idrizi nga komuna e Skenderajt, e cila ka shënuar një rekord të ri në librin e rekordeve botërore Guinness, me lulen më të madhe në botë të punuar nga letra, apo siç njihet, stili origami.

Lulja origami që e vendosi emrin e Arbnorës në librin e famshëm botëror ka një madhësi prej 8.7 metrash. E lajmi është bërë publik edhe në faqen zyrtare të Librit të Guinnessit, raporton Koha.net.

Arbnora bëri të ditur përmes faqes së saj në Facebook për këtë rekord, duke u shprehur:

“Me emrin e Allahut sot e fitova titullin Rekord Botëror Guinnes. Jam e lumtur që e përfaqësova Skenderajn, Kosovën”.

Veç saj, edhe kryetari i Komunës, Bekim Jashari, u shpreh i lumtur me këtë rekord.

“Ç’kënaqësi kur të mirat vijnë njëra pas tjetrës! Pas lajmit të djeshëm për Ushtrinë e Kosovës, jo vetëm Skenderaj por e gjithë Kosova sot nderohen nga znj.Arbnora Fejza Idrizi, e cila ka thyer rekordin botëror të punimit të lules më të madhe në botë origami, me përmasa 13x13 metra”, ka shkruar Jashari në Facebook.

Ndërkaq, në emailin konfirmues që asaj i ka arritur nga Guinnessi, thuhet se Arbnorës i takon tashmë një certifikatë që njeh veprën e saj.

Image

“Jemi të gëzuar të ju njoftojmë se aplikimi juaj për lulen më të madhe origami ka qenë i suksesshëm dhe tani ju jeni Mbajtëse e Titullit për Rekord Botëror Guinness. Juve tani ju takon një certifikatë komplimentuese e Guinness World Records”, shkruan në emailin që Arbnora e ka pranuar nga Guinnessi.

Image

Ndër shqiptarë tjerë punët e të cilëve janë njohur nga Guinnessi janë edhe artisti Saimir Strati i cili rekordin e fundit Guinness e ka thyer me portretin e Nënë Terezës ku ka përdorur mbi 1.5 milion kapësi teli.

Edhe Agim Agushi, rekordmeni kosovar i njohur për mbajtjen e topit me kokë, ka thyer rekordin Guinness i cili është mbajtur në Kosovë. Agushi e ka mbajtur topin në kokë me tundje për 4 orë, 2 min e 01 sekonda, duke qëndruar i ulur gjatë gjithë kësaj kohe pa lëvizur.

Po ashtu, edhe Shaban Binaku mbajtës rekordi në Guinness pasi, para rreth 4 vitesh ai e kishte fituar çmimin më të madh të lotarisë që ndonjëherë ka fituar dikush në një bingo në Londër duke hyrë kështu në librin e rekordeve “Guinness”.

Arbnora ka 10 vjet që merret me artin e origamit.

© KOHA. Të gjitha të drejtat janë të rezervuara.

Komentet

Shto koment

Të ngjashme