Levits: Partneriteti për Paqe, hapi i Kosovës drejt NATO-s

Presidenti i Letonisë, Egils Levits, gjatë takimeve me liderët e institucioneve, ka premtuar mbështetje për Kosovën në proceset e integrimeve evropiane dhe të anëtarësimit në NATO. Referuar luftës në Ukrainë, ai ka thënë se duhet të ripërtërihet arkitektura e sigurisë dhe e vetë Evropës

Përfshirja në Partneritetin për Paqe është hapi që Kosova duhet të ndjekë në rrugëtimin e saj drejt aleancës euroatlantike, NATO, ka thënë të premten në Prishtinë presidenti i Letonisë, Egils Levits. Në takimet me liderët institucionalë të Kosovës, Levits ka premtuar mbështetjen e Letonisë në këtë dhe proceset e tjera integruese të Kosovës.

“Është me rëndësi që të zgjerojmë bashkëpunimin mes NATO-s e Kosovës. Si hap i parë së paku, është e domosdoshme që Kosova t’i bashkohet Partneritetit për Paqe dhe mendoj që tani është koha e duhur për ta bërë këtë hap. Varet nga NATO-ja, NATO-ja është ajo që vendos rreth kësaj, sepse është shumë me rëndësi që të fuqizohet bashkëpunimi mes inkuadrimit në NATO dhe Lituania është duke e përkrahur këtë hap”, ka deklaruar Levits, në konferencën për media, pas takimit me presidenten Vjosa Osmani.

Partneriteti për Paqe është program në kuadër të NATO-s, nëpërmjet së cilit synohet që të ndërtohen marrëdhënie të sigurta, të rritet stabiliteti e të zvogëlohen kërcënimet ndaj paqes mes vendeve partnere dhe NATO-s, por edhe ndërmjet vendeve partnere. Derisa më parë përmes këtij programi është synuar që të hiqen barrierat mes vendeve e ofrohet siguri nëpërmjet dialogut e bashkëpunimit, tani ky program përfshin edhe trajtimin e sfidave të sigurisë.

E pikërisht rishikimi i konceptit të sigurisë ishte një nga aspektet që e përmendi presidenti i Letonisë në konferencën për media.

“Arkitektura e sigurisë dhe e Evropës duhet të ripërtërihet dhe të bazohet në realitet. Realiteti është që duhet të ballafaqohemi me një Rusi agresive dhe natyrisht shtetet evropiane, NATO-ja dhe aleatët më të rëndësishme ushtarak në botë, patjetër të gjitha shtetet evropiane duhet t`i bazojnë, vendosin ato konceptet e mbrojtjes së tyre bazuar në realitetin”, deklaroi Levits.

Më tej ai shtoi se e mbështesin Kosovën në procesin e saj integrues në BE, por që e shohin të rëndësisë së veçantë anëtarësimin e Kosovës në organizatat ndërkombëtare. “Do të përmendja këtu para së gjithash Këshillin e Evropës. Këshilli i Evropës është një organizatë e shteteve demokratike që bazohet në sundimin e ligjit, kjo do të thotë se Kosova i përket familjes së Këshillit të Evropës sepse është një shtet demokratik që bazohet në sundim të ligjit. Ne do të mirëpritnim aplikimin e Kosovës në Këshillin e Evropës. Ne po ashtu mund të shkëmbejmë përvojat tona për të gjetur rrugën drejt anëtarësimit në Këshillin e Evropës”.

Sa i përket dialogut me Serbinë, presidenti i Letonisë ka thënë se nuk duhet te jetë pengesë për Kosovën në ndërtimin e raporteve e integrimit në fusha të tjera.

“Po e vërej që ekzistojnë disa probleme të ndryshme në dialogun Kosovë-Serbi, por shpresoj që këto bisedime do të përparojnë. Nëse nuk kemi progres të madh, kjo nuk duhet të jetë pengesë për Kosovën në drejtime dhe raporte të tjera. Dialogu Kosovë-Serbi është shumë i rëndësishëm, por edhe nëse nuk ka progres, ka mënyra të tjera se si Kosova të jetë më shumë e integruar në kornizat evropiane”, ka deklaruar Levits.

Për ngecjet në bisedimet me Serbinë, presidentja Vjosa Osmani ia ka lënë regjimit në Beograd, duke e kritikuar atë për moszbatim të marrëveshjeve të arritura e bllokimin e tyre. Sipas Osmanit, një gjë e tillë është duke u bërë nga Serbia, për shkak se, siç tha ajo, shteti fqinj nuk i pranon standardet evropiane.

Osmani teksa është pyetur për dështimin e marrëveshjes për targat, ka thënë që tentimet për të arritur një marrëveshje do të vazhdojnë edhe më tej.

“Jo vetëm marrëveshja permanente për targat, por edhe marrëveshjet e tjera, të cilat ne si Republikë e Kosovës i kemi shtyrë përpara në përputhje të plotë me parimet dhe standardet evropiane, për fat të keq janë bllokuar nga ana e Serbisë. Për një arsye të vetme sepse Serbia nuk po i pranon këto parime dhe standarde evropiane... Republika e Kosovës ka dhënë maksimumin si një palë konstruktive në dialog që të arrihet një marrëveshje ashtu siç ka kërkuar BE-ja, në përputhje me kriteret dhe parimet dhe standardet e Bashkimit Evropian, por ne nuk mund të marrim përgjegjësi për bllokadën që po e shkakton pala tjetër, në këtë rast po e shkakton pala serbe”, ka deklaruar Osmani, në konferencën e përbashkët me presidentin letonez.

Ajo kërkoi nga shteti i Letonisë mbështetjen në procesin e integrimeve.

“Duke qenë se Letonia është një zë kyç në NATO dhe në Bashkimin Evropian, kam kërkuar mbështetjen e presidentit Levits në rrugëtimin tonë drejt integrimit tonë euroatlantik dhe kam theksuar se këto aleanca duhet t’i kenë gjithnjë dyert e hapura për shtetet si Republika e Kosovës, duke treguar përkushtimin dhe plotësimin e kritereve për të qenë pjesë e saj”.

Presidenti letonez është pritur edhe nga kryekuvendari, Glauk Konjufca, e kryeministri, Albin Kurti.

Konjufca, sipas njoftimit të Kuvendit, ka falënderuar presidentin Levits për mbështetjen e vazhdueshme që Republika e Letonisë ka ofruar për Republikën e Kosovës në të gjitha proceset shtetndërtuese, duke shprehur njëherësh mirënjohje edhe për kontributin e trupave letoneze që veprojnë në kuadër të KFOR-it.
“Duke folur për situatën aktuale politike dhe sfidat e sigurisë, si pasojë e agresionit të paprovokuar rus në Ukrainë, kryetari Konjufca theksoi se Rusia dhe aleati i saj, Serbia, përbëjnë kërcënim serioz për paqen e stabilitetin rajonal dhe më gjerë. Prandaj është nevojë urgjente integrimi euroatlantik i Ballkanit Perëndimor, theksoi ai, duke kërkuar nga presidenti Levits mbështetjen e Letonisë ndaj Kosovës në këtë rrugëtim”, thuhet në njoftimin e Drejtorisë për Media dhe Marrëdhënie me Publikun të Kuvendit.

Ndërsa, sipas njoftimit nga Qeveria, kryeministri Kurti e ka informuar presidentin e Letonisë me angazhimin për të siguruar stabilitet politik e zhvillim ekonomik. Nga presidenti i Letonisë, sipas njoftimit nga ekzekutivi, kanë marrë mbështetje për anëtarësimin e Kosovës në Këshillin e Evropës dhe për përfshirjen në Programin e Partneritetit për Paqe.

“Në takim u bisedua edhe për situatën e sigurisë në Evropë dhe në rajon, pas invazionit dhe agresionit të Federatës Ruse në Ukrainë. Që të ruhet paqja dhe stabiliteti afatgjatë, kryeministri Kurti tha se është i domosdoshëm integrimi sa më i shpejtë dhe i plotë i Ballkanit Perëndimor në Bashkimin Evropian dhe në NATO”, thuhet në njoftimin e Qeverisë.

Levtis qëndroi në Kosovë me ftesë të presidentes, Vjosa Osmani.