Kulturë

“Kosovarja Këndon” mban ritmin për 50-vjetor, e çakorduar nga financat

“Kastriotët” bashkë me konkurrentet në prova intensive për “Kosovarja Këndon”

Kur po mbush gjysmëshekulli, “Kosovarja Këndon” përballet me krizë organizative. Kjo për shkak të mungesës së mbështetjes financiare dhe të objektit ku instrumentistët mund të mbajnë provat në mënyrë të denjë. Ndërkaq provat kanë nisur në Galerinë e Arteve në Ferizaj dhe sivjet do të prezantohen 18 zëra të rinj

 

Kur po mbush gjysmëshekulli, “Kosovarja Këndon” përballet me krizë organizative. Kjo për shkak të mungesës së mbështetjes financiare dhe të objektit ku instrumentistët mund të mbajnë provat në mënyrë të denjë. Ndërkaq provat kanë nisur në Galerinë e Arteve në Ferizaj dhe sivjet do të prezantohen 18 zëra të rinj

Ka histori e traditë. Për shumë vjet ka dhënë mesazhin e kultivimit të muzikës së mirëfilltë shqipe. Vlerat i ka çuar përpara me zërat e vajzave e grave duke siguruar emancipimin e tyre muzikor. Pikënisja: viti 1972. Ka bërë nam edhe me artistët, të cilët kanë interpretuar në skenën e tij. E po njësoj edhe prej emrave që e kanë udhëhequr.

Në të gjallë, Bilbili i Kosovës, Nexhmije Pagarusha, vetë ua ka përcjellë laureateve të përvitshme çmimin special që mban emrin e saj. Në vitin 2018 edhe ka interpretuar në skenë. Ndërkaq për vite me radhë festivali ka pasur udhëheqës artistik kompozitorin e njohur Fahri Beqiri, me kontribut 40-vjeçar për Festivalin.