Gjykata Themelore në Prishtinë – Departamenti Special e ka dënuar me 5 vjet burgim dhe 2 mijë e 500 euro gjobë shtetasin e Shqipërisë, A. N. i akuzuar se kishte transportuar mbi 500 kilogramë marihuanë për në Kosovë.
Shpallja e aktgjykimit është bërë nga kryetari i trupit gjykues, gjykatësi Valon Kurtaj.
Gjykatësi Kurtaj tha se A.N. është fajtor për veprën penale të ri-cilësuar nga gjykata sipas detyrës zyrtare dhe atë veprën penale në vazhdimësi blerja, posedimi dhe shitja e paautorizuar e narkotikëve, substancave psikotrope dhe analoge dhe i është shqiptuar dënimi me burgim në kohëzgjatje prej 5 vjetësh, si dhe dënimin me gjobë në lartësi prej 2 mijë e 500 euro, të cilin dënim i akuzuari duhet ta paguajë në afat prej 15 ditëve pas plotfuqishmërisë së këtij aktgjykimi.
Ndërsa, në rast se i akuzuari nuk dëshiron apo nuk mund të paguajë dënimin me gjobë, gjykata do t’ia zëvendësojë me dënim me burgim.
Po ashtu, i akuzuari obligohet të paguajë shumën prej 200 euro në emër të shpenzimeve procedurale dhe shumën prej 100 euro në emër të Fondit për Kompensimin e Viktimave të Krimit, të gjitha këto në afat prej 15 ditëve pas plotfuqishmërisë së këtij aktgjykimi, në kërcënim të përmbarimit të dhunshëm.
Kurse, sasia e narkotikut objekt të kësaj çështjeje penale, është e konfiskuar me aktgjykimin e 26 shkurtit të vitit 2019.
Apeli kishte kthyer çështjen në rigjykim vetëm sa i përket A.N. pas aktgjykimit refuzues të shpallur me 14 janar 2022, ku ishte refuzuar akuza sepse nuk kishte aktvendim për fillimin e hetimeve.
Ndryshe, aktakuza në këtë rast është përpiluar në shtator të vitit 2019 nga prokurori Blerim Isufaj, i cili mban pozitën e Kryeprokurorit të PSRK-së dhe kjo lëndë ishte e shënjestruar për liberalizim të vizave.
Më 26 shkurt 2021, Departamenti Special i Gjykatës Themelore në Prishtinë kishte shpallur aktgjykim dënues ndaj nëntë të akuzuarve për krim të organizuar, Xh. S., A.N., G.K., J.B., F.B, F.B. dhe D.S. si dhe ndaj të akuzuarit për shmangie nga tatimi, B. S..
Ata ishin dënuar me nga 3-8 vjet burgim
Gjykata e Apelit kishte vërtetuar aktgjykimin e shkallës së parë për gjithë të dënuarit tjerë, përveç për A. N. ku rastin për të e kishte kthyer në rigjykim më 21 shtator 2021. / Betimi për Drejtësi
© KOHA. Të gjitha të drejtat janë të rezervuara.
