Një zyrtar policor me gradë të kapitenit është suspenduar pasi të shtunën në mbrëmje ka rrezikuar jetën e dy qytetarëve për shkak të vozitjes së rrezikshme.
Inspektorati Policor i Kosovës ka njoftuar se ngjarja ka ndodhur në Gjilan, ndërsa i dyshuari ka qenë nën ndikim të alkoolit.
“Zyrtarit policor të dyshuar në këtë rast i është bërë testi i alkoolit dhe ka rezultuar së i njëjti ka qenë duke drejtuar veturën e tij private (jashtë detyrës zyrtare) nën ndikimin e alkoolit. Në konsultim me prokurorin kujdestar është iniciuar rast me dyshimin për veprën penale ‘Shkaktim i rrezikut te përgjithshëm’. Zyrtari policor është suspenduar përkohësisht përderisa rasti sipas urdhrit të Prokurorit do të trajtohet sipas procedurës së rregullt”, thuhet në njoftimin e IPK-së.
Më tej është njoftuar se veprime të tjera do të ndërmerren në përputhje me autorizimet ligjore të IPK-së dhe në koordinim me prokurorinë kompetente.
