-
Nga:
Associated Press
- 7 janar 2023 10:00
- Shpërndaje në:
Portugezi Cristiano Ronaldo nuk është superylli i parë i futbollit që shkon në një nga ligat e vlerësuara si të vogla, në vitet e fundit të karrierës. Tundimi për një pagë të majme, pastaj për të qenë udhërrëfyes në një vend që kërkon të rrisë pozitën e tij në sport, ose thjesht për të provuar diçka tjetër, ishte shpesh shumë i madh për t’u rezistuar.
Jo çdo lojtar përshëndetet nga futbolli në një top ekip dhe ligë si Zinedine Zidane – edhe nëse francezi u përjashtua me karton të kuq në ndeshjen e fundit të karrierës së tij me Francën, në finalen e Kupës së Botës 2006.
Të tjerë, si Pele, Johan Cruyff, Zico, Xavi Hernandez dhe tani 37-vjeçari Ronaldo i transferuar në klubin e Arabisë Saudite, Al-Nassr, e kanë gjetur veten duke e zgjatur karrierën në vende pa futboll cilësor, por zakonisht me shuma të majme parash.
Pele
Ishte një lëvizje që ndryshoi historinë e sportit në SHBA. Pele, braziliani më i madh dhe fitues i tri Kupave të Botës, nënshkroi për New York Cosmos në vitin 1975 pasi u josh nga ekipi për katër vjet. Për dy edicione e gjysmë, Pele fitoi 2.7 milionë dollarë, por braziliani i dha popullaritet futbollit amerikan. Pjesëmarrja mesatare e tifozëve në ndeshjet e Cosmosit u trefishua në vitin e parë të Peles dhe vazhdoi të rritej. Ai shënoi 37 gola në 64 ndeshje në Ligën e Futbollit të Amerikës së Veriut dhe bëri të gjithë punën për të motivuar të rinjtë që të luanin futboll.
“Ne nuk do të ishim këtu ku jemi sot”, tha komisari i MLS-së, Don Garber, “nëse nuk do të ishte Pele”. Që atëherë, shumë lojtarë me nam kanë shkuar në SHBA, zakonisht për t'i dhënë fund karrierës së tyre dhe për arsye të stilit të jetesës. Franz Beckenbauer, Johan Cruyff, George Best, David Beckham e Thierry Henry janë disa prej tyre.
Zico
Zico kujtohet pothuajse me po aq mall në Japoni sa edhe në Brazilin e tij. Pas dy periudhave shumë të suksesshme në Flamengo, pastaj tek Udinese në Itali, lojtari i tha lamtumirë futbollit aktiv, për të dalë nga pensioni në moshën 38-vjeçare dhe për të ndihmuar në futjen e futbollit japonez në profesionalizëm. Ai luajti për katër sezone në Kashima Antlers (1991–94), një periudhë që kapi edhe inaugurimin e J-League në vitin 1993. Zico qëndroi në Japoni deri në vitin 2006, duke punuar në Kashima si drejtor teknik dhe më pas trajner, përpara se të bëhej selektor i përfaqësueses. Që atëherë ai është zgjedhur në “Hollin e Famës” të futbollit japonez dhe njihet si “Zoti i Futbollit” në Japoni.
Së bashku me Gary Linekerin, i cili gjithashtu luajti në Japoni, Zico konsiderohet një figurë kyç në zhvillimin e futbollit japonez dhe rritjen e popullaritetit të tij. Dunga, Hristo Stoichkov dhe së fundmi Andres Iniesta, janë emra të tjerë të mëdhenj që kanë luajtur në Japoni.
Xavi
Xavi nuk ishte ylli i parë që zbarkoi në ligën më të mirë të Katarit. Por ai mund të jetë më i spikaturi duke pasur parasysh se mbërriti në mes të vitit 2015, në moshën 35-vjeçare, pasi ishte kapiteni i Barcelonës që ngriti trofeun e Ligës së Kampionëve javë më herët.
Liga ishte zhvilluar për më shumë se 40 vjet deri në atë moment dhe që nga fillimi i shekullit kishte joshur lojtarë të profilit të lartë, si Marcel Desailly, Pep Guardiola, Gabriel Batistuta dhe Raul Gonzalez. Edhe Romario luajti në Katar, ndonëse nuk pati më shumë se tri ndeshje për të cilat u pagua 1.5 milionë euro. Kjo ishte përpara se Katari, në vitin 2010, të fitonte të drejtën për të organizuar Kupën e Botës 2022.
Xavi - një nga lojtarët më të mëdhenj të Spanjës – qëndroi për gjashtë vjet, por punoi edhe si trajner dhe ambasador i Kupës së Botës. Ai ishte lojtar i ekipit Al-Sadd, të cilin e drejtoi më pas, ndërsa tani është në krye të Barcelonës.
Alessandro Del Piero
Del Piero, sulmuesi i madh që fitoi Kupën e Botës me Italinë, është padyshim emri më i madh që ka luajtur në futbollin australian. Ikona italiane qëndroi dy vjet me Sydney FC (2012-14) në atë që u përshkrua nga klubi si “kontrata më e madhe sportive profesionale në historinë australiane”. Ishte raportuar se Del Piero kishte pagë prej dy milionë dollarësh në sezon.
Del Piero shënoi 24 gola në 48 ndeshje. Por si një superyll i rrallë që luajti futboll në Australi, tha se kënaqësia e tij më e madhe ishte të ndihmonte në rritjen e lojës, si dhe shikueshmërisë. Një rekord prej 35,000 spektatorësh ndoqën debutimin e 38-vjeçarit Del Piero, ndërsa anëtarësimi në Sydney u rrit përtej 10,000 persona, gjë që, sipas klubit, e promovoi A-Leaguen në skenën botërore.
Asnjë lojtar tjetër në A-League, në të kaluarën apo të tashmen, nuk i afrohet peshës së Del Pieros, falë të cilit futbolli australian mori një ngritje dhe në Botërorin e fundit arriti deri në 1/8 e finales.
