Një shofer është gjobitur për tejkalim të shpejtësisë në Lausanne të Zvicrës dhe tani përballet me 90,000 franga dënim. Por, ai mund ta përballojë këtë shumë.
Kjo shumë e lartë për tejkalim i është dhënë sepse shoferi është një prej njerëzve më të pasur të Zvicrës, kështu që kantoni i Vaudit lëshon gjoba bazuar në faktorë si të ardhurat, pasuria ose situata financiare e familjes.
Kjo nuk ndodh vetëm në Zvicër. Gjermania, Franca, Austria dhe shtetet nordike po ashtu lëshojnë gjoba bazuar në pasurinë e personit. Gjoba e fundit nuk është rekord në Zvicër. Më 2010, një milioner shofer i Ferrarit u gjobit me 233,000 franga.
Sipas rregullave, një person i varfër mund ta kalojë një natë në burg në vend të gjobës, kurse të pasurit në Zvicër mund të përballen me dhjetëra mijëra franga dënim.
Mediat zvicerane raportuan se personi i gjobitur është shtetas francez i listuar ndër 300 njerëzit më të pasur në Zvicër, me një pasuri prej qindra miliona dollarësh.
Në Zvicër, dënimeve për tejkalim shpejtësie nuk u shpëtojnë as policët: Një polic ishte gjobitur për shpejtësi dy herë më shumë se ajo e lejuar në rrugët e Gjenevës më 2016 derisa po ndiqte hajnat që kishin hedhur në erë një bankomat.