Arrestohet ish-zyrtari në Ferizaj, e regjistroi një turk pa i plotësuar kriteret e shtetësisë

Një zyrtar është arrestuar për keqpërdorim të pozitës apo autoritetit zyrtar në Ferizaj. 

Policia e Kosovës pas një hetimi të gjatë ka siguruar dëshmi se i dyshuari - ish-zyrtar i gjendjes civile në Ferizaj e tani me pozitë tjetër – derisa ishte zyrtar i gjendjes civile deri në vitin 2019, si ofiqar, dyshohet se ka keqpërdorur pozitën.

Lidhur me rastin dyshohet se i dyshuari ka keqpërdorur detyrën zyrtare duke regjistruar një shtetas të huaj, turk, në sistemin elektronik të gjendjes civile në komunën e Ferizajt, teksa i njëjti nuk i kishte plotësuar kriteret e fitimit të shtetësisë, ka sqaruar Policia përmes një komunikate. 

I dyshuari ia ka mundësuar të huajit të pajiset me letërnjoftim të Republikës së Kosovës dhe pastaj edhe me patentë shofer.

Të martën është siguruar prezenca e të dyshuarit dhe pas intervistimit është dërguar në mbajtje për 48 orë. 

Ndërsa, personi i dyshuar turk që dyshohet se ka kryer veprën penale “Legalizimi i përmbajtjes së rreme”, tani është i ekstraduar në Turqi.