Granit Xhaka e luajti të shtunën ndeshjen e parë me skuadrën e re, Sunderlandin. Në miqësoren ndaj Real Betisit, Xhaka startoi dhe kishte trakën e kapitenit në krah. Dhe, ashtu si pritej, ishte lider në mesfushën e Sunderlandit.
Real Betisi fitoi 1:0, por trajneri Regis Le Bris ka parë gjëra të mira, sidomos në pjesën e parë. Ai foli edhe për Xhakën.
“Na duhet maturi, kualitet, vazhdimësi dhe përvojë – ai i ka të gjitha”, ka thënë Le Bris.
Sipas tij, “Xhaka e bën më të lehtë për lojtarët përreth tij” dhe se lojtarë të tillë duhen në Premier League.
Trajneri i Sunderlandit po ashtu ka konfirmuar se Xhaka do të jetë kapiten.
“Ai me gjasë do të jetë kapiten, po”.