Spanja i është bashkuar Portugalisë në finalen e Ligës së Kombeve pas fitores ndaj Francës.
Gjysmëfinalen e zhvilluar në “Stuttgart Arena” të enjten mbrëma, Spanja e fitoi me rezultatin 5:4.
Në fushë pati një numër të madh të yjeve të futbollit, por vëmendja ishte te dy pretendentët për “Topin e Artë”, Ousmane Dembele dhe Lamine Yamal. Ceremonia e çmimit prestigjioz mbahet më 22 shtator në Paris.
Por ishte futbollisti i Barcelonës, talenti Yamal, ai i cili e mori vëmendjen.
Spanja krijoi epërsi të shpejtë prej dy golash brenda tre minutave.
Në minutën e 22-të, për 1:0 realizoi Nico Williams, ndërsa Mikel Merino e dyfishoi rezultatin tre minuta më vonë.
Futbollistit të ri të Real Madridit, Dean Huijsenit iu anulua një gol i minutës së 44-t për pozitë jashtë loje.
Pjesa e dytë nisi furishëm nga spanjollët. Yamal shënoi për 3:0 në minutën e 54-t nga penalltia e fituar vetë, ndërsa vetëm një minutë më vonë, Pedri realizoi për 4:0.
Kylian Mbappe nga ana tjetër nga penalltia po ashtu shënoi për 4:1, pas afro një ore lojë.
Yamal realizoi tjetër gol në minutën e 67-të për 5:1.
Franca u mundua të kthehej në lojë dhe realizoi dy herë. Një herë me supergolin e Ryan Cherkit në minutën e 79-të. Cherki e ndali topin dhe me vollej-gjuajtje e mposhti portierin Unai Simon.
Dani Vivian gjashtë minuta para fundit realizoi autogol për 5:3.
Cherki asistoi edhe në golin e katërt të Francës, që nuk arriti të bënte më shumë. Për 5:4 shënoi Randal Kolo Muani.
Yamal ka dhënë kontribut të jashtëzakonshëm për Barcelonën e Spanjën.
Ai ka dhënë kontribut në 76 gola, me gola e asistime të realizuara.
Si 17-vjeçar është fitues i Kampionatit Evropian me Spanjën, ndërsa me Barcelonën e ka fituar La Ligan, Kupën e Mbretit dhe Superkupën e Spanjës.
Në fakt ai i ka dy La Liga, pasi si 15-vjeçar luajti një ndeshje në edicionin 2022-23.
Tani e ka rastin ta fitojë edhe Ligën e Kombeve me Spanjën, në finalen e 8 qershorit në Munich ndaj Portugalisë. Ndeshja nis në orën 21:00.
Ndërkohë në stadiumin e Stuttgartit, Franca luan nga ora 15:00 me Gjermaninë, në ndeshjen për vend të tretë.
Në gjysmëfinale, të dyja përfaqësueset arritën falë ekzekutimit të penalltive.
Spanja e kishte eliminuar Holandën, ndërsa Franca kishte fituar ndaj Kroacisë.
Portugalia në vitin 2019, Franca në vitin 2021 dhe Spanja në vitin 2023, janë fitueset e tri edicioneve të para të Ligës së Kombeve.
GOLAT
Franca kthehet në lojë
Dani Vivian ka realizuar autogol dhe tani rezultati është 5:3 në të mirë të Spanjës.
Vivian shënoi në portën e vet në minutën e 84-t.
Supergol i Cherkit
Ryan Cherki ka realizuar supergol për Francën.
Ai e ndali topin dhe gjuajti menjëherë me vollej, duke e mposhtur portierin Unai Simon.
Ndodhi kjo në minutën e 79-të.
Spanja po udhëheq 5:2.
Edhe dy gola tjerë në Stuttgart
Spanja është duke fituar 5:1 ndaj Francës.
Kylian Mbappe e ngushtoi rezultatin në 4:1 nga penalltia e realizuar në minutën e 59-të.
Por ishte Yamal që shënoi tjetër gol për Spanjën për rezultatin 5:1, në minutën e 67-të.
Spanja po e deklason Francën
Spanja është thuajse në finale vetëm pritet fundi i ndeshjes dhe rezultati përfundimtar.
Spanja është duke e deklasuar Francën në gjysmëfinalen e dytë të Ligës së Kombeve, 4:0.
Ndeshja po luhet në stadiumin “Stuttgart Arena”.
Nico Williams në minutën e 22-të, Mikel Merino në minutën e 25-të, Lamine Yamal në minutën e 54-t nga penalltia dhe Pedri një minutë më vonë, kanë realizuar për fituesen në fuqi të Kampionatit Evropian.
