Lamine Yamalit i është dhuruar numrin ikonë i fanellës, dhe do të jetë 10-shi i ri i Barcelonës. Fanella me numrin 10-të më herët është mbajtur veshur edhe nga legjenda e futbollit, Lionel Messi.
Lajmi është konfirmuar të mërkurën nga klubi nga Katalunja.
Yamali, i cili mbushi 18 vjeç të dielën, do ta mbajë veshur këtë fanellë nga edicioni i ardhshëm.
Në edicionin e kaluar, fanellën me numrin 10-të e ka mbajtur veshur Ansu Fati, i cili është huazuar për një edicion te Monaco më herët gjatë këtij muaji.
Njoftimi ka ardhur vetëm pak ditë pasi ndaj sulmuesit të krahut është nisur hetimi pasi ylli i futbollit punësoi njerëz me trup të shkurtër për të performuar në festën e tij, për ditëlindjen e 18-të.
Përveç fanellës me numrin 10-të, Yamali ka nënshkruar edhe kontratën e re me klubin që do të përfundojë në vitin 2031.
Messi e mbajti veshur fanellën me numrin 10-të te Barcelona nga viti 2008, deri në vitin 2021 kur u largua nga skuadra drejt Paris Saint-Germainit.
Argjentinasi është legjendë e klubit pasi i fitoi 10 tituj të La Ligas dhe katër Liga të Kampionëve. Lionel Messi është edhe golashënuesi më i mirë në histori të klubit.
Ansu Fati e mori numrin e Messit pas largimit, por pati shumë lëndime dhe nuk arriti ta shfaqë formën më të mirë në ekipin e Barcelonës.
Ndërkohë, në skenë u shfaq Yamal, që vlerësohet si njëri prej lojtarëve më premtues dhe këtë ka shfaqur në ndeshjet me Barcelonën e Spanjën.
Tinejxheri, i cili tashmë ka luajtur në 106 ndeshje me Barcelonën dhe ka 25 gola të shënuar, tani do ta ketë numrin më të rëndësishëm në fanellë, në historinë e klubit.
Përveç Messit, fanellën me numrin 10-të te Barcelona e kanë mbajtur veshur edhe lojtarët e mëdhenj si Ronaldinho, Rivaldo, Romario e Diego Maradona.
Yamali në të kaluarën ka mbajtur veshur edhe fanellën me numrin 41, 27 e 19-të.
Yamali me Barcelonën ka fituar dy tituj të La Ligas, një Kupë të Mbretit dhe një Superkupë të Spanjës.
Ai është fitues i Kampionatit Evropian me Spanjën, në turneun që vitin e kaluar u organizua në Gjermani.
