Publikohet letra e Serbisë për UEFA-n, përmendet edhe veprimi i Dakut

Mediat serbe e kanë publikuar të enjten letrën që Federata e Futbollit të Serbisë e ka dërguar në UEFA. Përmes letrës, federata serbe ka kërkuar dënimin e FSHF-së dhe Federatës së Futbollit të Kroacisë për thirrjet “mbyte serbin” të dëgjuara gjatë ndeshjes Kroaci – Shqipëri.

Sipas federatës serbe, ndeshja është dashur të ndërpritet dhe t’u tërhiqet vërejtja tifozëve për thirrjet e bëra. Federata serbe ka shprehur habinë se pse kjo nuk ka ndodhur, ndërsa ka kërkuar dënime meritore për përgjegjësit.

Po ashtu është përmendur edhe veprimi plotësisht i pamatur i Mirlind Dakut, që mori megafonin dhe bëri fyerje ndaj serbëve dhe maqedonasve. Daku nuk është përmendur me emër, por tashmë federata e Maqedonisë së Veriut ka kërkuar masa ndaj tij.

“Në bazë të informatave që kemi, një lojtar i Shqipërisë pas fundit të ndeshjes, para tribunës me tifozët shqiptarë, me megafon ka bërë thirrje të njëjtë dhe ka ndezur publikun”, shkruan në letrën e federatës serbe të futbollit.

Mediat kroate kanë shkruar se thirrjet “mbyte serbin” janë bërë nga tifozët shqiptarë, ndërsa atyre u janë bashkuar edhe një pjesë e tifozëve kroatë.