Zonat malore të Zvicrës janë mbuluar nga bora të shtunën, duke shkaktuar vështirësi në trafikun rrugor. Në Bettmeralp, kantoni Wallis, dhe në maloren First në Grindelwald, kantoni Bern, qytetarët u zgjuan me një peizazh të bardhë dhe shumë borë.
Sipas “Meteo Schweiz”, kufiri i borës luhatet midis 1800 dhe 2100 metrave. Në Alpet perëndimore dhe jugore pati deri në 50 centimetra borë.
Kalimi i rrugës së Gotthardit u mbyll në të dyja drejtimet. Po ashtu, rrugët Tiefenbach–Gletsch dhe Wassen–Meiringen mbeten të mbyllura për shkak të reshjeve.
Ndërsa në male bie bora, në zonat e ulëta të Zvicrës bie shi.
E diela do të jetë kryesisht e thatë, me temperatura që në disa zona mund të arrijnë deri në 18 gradë.
