Të paktën katër palestinezë janë vrarë në një sulm ajror që Izraeli ka kryer në qytetin Rafah të Gazës, natën e së martës.
Trupat e të vdekurve janë dërguar në spitalin Abu Youssef al-Najjar, raportoi AP.
Shpërthimi ka rrafshuar një ndërtesë banimi në Rafah, derisa banorët kanë thënë se më shumë se dhjetë persona kanë mbetur nën rrënoja.
Mëngjesin e së mërkurës, dhjetëra palestinezë ishin mbledhur për të bërë kërkime.
Sulmi vjen në kohën kur Izraeli po kërcënon vazhdimisht për ofensivë tokësore në Rafah, zona ku shumica e palestinezëve të Gazës janë zhvendosur.
Lufta e Hamas-Izrael ka nisur më 7 tetor, kur militantët e Gazës sulmuar Izraelin jugor duke lënë të vdekur 1,200 persona dhe duke marrë pengje 250 të tjerë.
Izraeli i është përgjigjur, duke nisur sulmet në Gaza, të cilat deri tani kanë lënë të vdekur më shumë se 32 mijë njerëz.
Sulmi i të martës në Rafah po shihet me shqetësim si një fillim i ofensivës izraelite mbi këtë qytet.
