-
Përktheu:
Flutura Gashi-Mehmeti
- 30 nëntor 2025 10:47
- Shpërndaje në:
Qeveria e Venezuelës i është përgjigjur me sfidë presionit të shtuar nga qeveria amerikane, përfshirë deklaratat e fundit të Donald Trumpit të shtunën, se hapësira ajrore mbi dhe përreth Venezuelës do të mbyllet në tërësi.
Në një deklaratë, qeveria e Venezuelës ka thënë se komentet e Trumpit janë një "kërcënim kolonialist" kundër sovranitetit të tyre dhe shkelin të drejtën ndërkombëtar. Qeveria ka thënë gjithashtu se kërkon respekt për hapësirën e saj ajrore dhe nuk do të pranojë urdhra ose kërcënime të huaja.
"Për të gjitha linjat ajrore, pilotët, tregtarët e drogës dhe trafikantët e qenieve njerëzore, ju lutemi merrni në konsideratë që hapësira ajrore sipër dhe përreth Venezuelës do të mbyllet në tërësi”, ka shkruar Trumpi të shtunën në një postim në Truth Social.
Për shkak të njoftimit të Trumpit, të gjitha fluturimet e deportimit të migrantëve u "pezulluan në mënyrë të njëanshme", ka njoftuar qeveria e Venezuelës. Fluturimet e deportimit drejt Venezuelës kanë qenë një pikë e rëndësishme polemike për administratën Trump, pasi ajo vazhdon të angazhohet në programin e saj të deportimit masiv.
Sulmet amerikane kundër anijeve të dyshuara për drogë në Karaibe kanë filluar prej muajsh, së bashku me një forcim ushtarak amerikan në rajon, dhe Trumpi ka autorizuar operacione të fshehta të CIA-s në Venezuelë.
Presidenti u ka thënë anëtarëve të shërbimit ushtarak këtë javë se SHBA-ja "shumë shpejt" do të fillojë operacione tokësore për të ndaluar trafikantët e dyshuar të drogës venezueliane.
Javën e kaluar, Administrata Federale e Aviacionit e SHBA-së (FAA) paralajmëroi linjat ajrore kryesore për një "situatë potencialisht të rrezikshme" kur fluturonin mbi Venezuelë.
Administrata Trump ka akuzuar presidentin venezuelian, Nicolas Maduro, për përfshirje në trafikun e drogës, një akuzë që ai e ka mohuar.
Maduro, në pushtet që nga viti 2013, ka thënë se Trumpi ka për qëllim që ta rrëzojë atë dhe se qytetarët dhe ushtria venezueliane do t'i rezistojnë çdo përpjekjeje të tillë.
Forcat amerikane në rajon deri më tani janë përqendruar në operacionet kundër narkotikëve.
Ato kanë kryer të paktën 21 sulme ndaj anijeve të dyshuara të drogës në Karaibe dhe Paqësor që nga shtatori, duke vrarë të paktën 83 persona.