Presidenti amerikan Donald Trump ka shkaktuar shqetësim ndërkombëtar pasi në një postim në rrjetet sociale u ka kërkuar të gjitha linjave ajrore, pilotëve dhe grupeve kriminale që të konsiderojnë hapësirën ajrore mbi dhe rreth Venezuelës si të mbyllur plotësisht, teksa tensionet me Caracasin po rriten.
Megjithëse SHBA-ja nuk ka autoritet të mbyllë hapësirën ajrore të një shteti tjetër, deklarata e Trumpit pritet të ndikojë në vendimet e kompanive ajrore dhe të krijojë pasiguri në fluturimet drejt e nga Venezuela.
“Për të gjitha linjat ajrore, pilotët, trafikantët e drogës dhe trafikantët e qenieve njerëzore, ju lutem konsideroni SE HAPËSIRA AJRORE MBI DHE PËRRETH VENEZUELËS ËSHTË PLOTËSISHT E MBYLLUR. Faleminderit për vëmendjen ndaj kësaj çështjeje!”, ka shkruar Trump në “Truth Social”.
Sipas mediave amerikane, ky postim mund të jetë ose një presion psikologjik ndaj regjimit të Nicolas Maduros, ose një paralajmërim i vërtetë për ndërhyrje ushtarake.
Prej muajit shtator, administrata Trump ka grumbulluar forcë të madhe ushtarake në rajon dhe ka kryer sulme ndaj anijeve të dyshuara për trafikun e drogës në ujërat ndërkombëtare — operacione që deri tani kanë shkaktuar 82 viktima.
Trumpi ka justifikuar sulmet duke pretenduar se SHBA-ja është në një “konflikt të armatosur” me kartelët e drogës, duke i cilësuar anijet e shkatërruara si kërcënim për jetën e amerikanëve.
Në Ditën e Falënderimeve, ai paralajmëroi një shtrirje të operacioneve edhe në tokë, duke lënë të kuptohet për mundësinë e goditjeve brenda territorit të Venezuelës. Ai falënderoi Forcat Ajrore të SHBA-ve për “pengimin e trafikut venezuelian të drogës”, duke pretenduar se trafiku detar është reduktuar me 85%.
Ndërkohë, pavarësisht tensioneve, Trumpi ka sinjalizuar edhe hapje për një zgjidhje diplomatike me presidentin venezuelian, Nicolas Maduro, ndonëse e ka akuzuar këtë të fundit se drejton një kartel droge dhe ka dyfishuar shpërblimin për kapjen e tij në 50 milionë dollarë.
Maduro, i cili vazhdon të qëndrojë në pushtet që nga viti 2013, pretendon se administrata amerikane po planifikon ta rrëzojë me forcë dhe u ka bërë thirrje qytetarëve dhe ushtrisë të përgatiten për rezistencë. Ish-zyrtarë venezuelianë i thanë “The Telegraph” se Maduro frikësohet për jetën e tij, duke besuar se mund të vritet nga një sulm amerikan ose nga një grusht shteti i brendshëm.