Kreu i agjencisë së sigurisë i Izraelit "Shin Bet" i ka paralajmëruar liderët shtetërorë se terrorizmi hebre në Bregun Perëndimor është jashtë kontrollit dhe se është bërë kërcënim serioz për sigurinë kombëtare.
Ronen Bar e ka bërë paralajmërimin në një letër për kryeministrin, Benjamin Netanyahu, prokurorin e përgjithshëm dhe anëtarët e kabinetit.
Letra e Barit e ka nxjerrë në pah hendekun e gjerë dhe të ashpër midis krahut të ekstremit të djashtë të koalicionit të Netanyahut dhe organit të sigurisë, raportoi Guardian.
Ministri për Siguri Kombëtare, Itamar Ben-Gvir, një prej të kritikuarve nga Bar, ka bërë thirrje që kreu i Shin Bet të pushohet.
Letra e Barit fokusohet në ekstremistët hebre, militantë të dhunshëm që kanë kryer vrasje dhe dhunë ndaj palestinezëve në Bregun Perëndimor, me synimin për t’i larguar nga toka e tyre.
Bar ka thënë se veprime të tilla nuk duhet të përshkruhen si kriminalitet, por si terrorizëm.
“Nuk është krim sepse është përdorim i dhunës për të krijuar frikë, për të përhapur frikë. Ky është terror”, ka shkruar ai.
Fushata e terrorizmit, thuhet në letër, është “njollë e madhe mbi judaizmin dhe mbi të gjithë ne”.
