Rusia zgjeron pushtimin në Ukrainë, vret të paktën 8 persona

Ushtria ruse ka ndërmarrë sulme me raketa dhe dronë mbi kryeqytetin ukrainas, Kiev, në orët e para të së enjtes, duke vrarë të paktën tetë persona, përfshirë një djalë gjashtëvjeçar dhe nënën e tij, si dhe duke plagosur të paktën 88 të tjerë, kanë bërë të ditur zyrtarët lokalë.

Autoritetet ruse kanë njoftuar gjithashtu të enjten se kanë kapur qytetin e Chasiv Yarit në Ukrainën lindore pas gati 16 muajsh luftime, duke hapur rrugën për përparime të mëtejshme.

Ministria ruse e Mbrojtjes ka lëshuar një deklaratë të shkurtër, në të cilën thuhet se forcat e saj e kanë “çliruar” qytetin.

Presidenti ukrainas, Volodymyr Zelensky, ka theksuar se Rusia lëshoi mbi 300 dronë dhe tetë raketa, duke goditur ndërtesa banimi në mbarë kryeqytetin, ka shkruar Reuters.

“Sot bota e ka parë sërish përgjigjen e Rusisë ndaj dëshirës sonë për paqe me Amerikën dhe Evropën. Prandaj, paqja pa forcë është e pamundur”, ka shkruar Zelensky në rrjetin social Telegram.

Kryetari i Kievit, Vitali Klitschko, ka njoftuar se nëntë fëmijë u plagosën — numri më i madh i të plagosurve në një natë të vetme në këtë qytet që nga fillimi i pushtimit të plotë të Rusisë, gati tre vjet e gjysmë më parë.

Shkolla dhe spitale ishin në mesin e ndërtesave që u goditën në 27 zona të ndryshme të qytetit, sipas autoriteteve.

Forcat Ajrore kanë raportuar për pesë goditje direkte me raketa dhe 21 goditje me dronë në 12 lokacione.

Ushtria ruse, e cila mohon kategorikisht se i ka për cak civilët, ka përshkallëzuar sulmet ajrore ndaj qyteteve dhe fshatrave ukrainase larg vijës së frontit gjatë muajve të fundit.