Milicitë e mbështetura nga Irani në Irak, të gatshme të çarmatosen për shkak të Trumpit

Disa grupe të fuqishme milicie në Irak, të mbështetura nga Irani, janë të përgatitura të çarmatosen për herë të parë për të shmangur kërcënimin e një konflikti të përshkallëzuar me administratën e SHBA-së Trump, i kanë thënë Reuters 10 komandantë të lartë dhe zyrtarë irakianë.

Lëvizja për të zbutur tensionet pason paralajmërimet e përsëritura të lëshuara privatisht nga zyrtarët amerikanë për qeverinë irakiane, qëkur Trumpi ka marrë pushtetin në janar, sipas burimeve që përfshijnë gjashtë komandantë të katër milicive kryesore.

Zyrtarët i thanë Bagdadit zyrtrar se nëse nuk vepron për të shpërndarë milicitë që veprojnë në tokën e tij, Amerika mund të synojë grupet me sulme ajrore, kanë shtuar burimet.

Izzat al-Shahbndar, një politikan i lartë mysliman shiit i afërt me aleancën qeverisëse të Irakut, i ka thënë Reutersit se diskutimet midis kryeministrit Mohammed Shia al-Sudani dhe disa liderëve të milicisë ishin "shumë të avancuara" dhe grupet ishin të gatshme të pajtoheshin me thirrjet e SHBA-së për çarmatim.

"Fraksionet nuk po veprojnë me kokëfortësi ose nuk po insistojnë të vazhdojnë në formën e tyre aktuale”, ka thënë ai, duke shtuar se grupet janë "plotësisht të vetëdijshme" se mund të shënjestrohen nga SHBA-ja.

Gjashtë komandantët e milicisë të intervistuar në Bagdad dhe një provincë jugore janë nga grupet Kataib Hezbollah, Nujabaa, Kataib Sayyed al-Shuhada dhe Ansarullah al-Awfiyaa.

“Trumpi është gati ta çojë luftën në nivele më të këqija, ne e dimë këtë dhe duam të shmangim një skenar kaq të keq”, ka thënë një komandant i Kataib Hezbollah, milicia më e fuqishme shiite.

Komandantët kanë thënë se aleati dhe mbrojtësi i tyre kryesor, forca ushtarake elitare e Gardës Revolucionare të Iranit (IRGC), u kishte dhënë atyre bekimin e saj për të marrë çfarëdo vendimi që ata e konsideronin të nevojshme për të shmangur përfshirjen në një konflikt potencialisht shkatërrues me Shtetet e Bashkuara dhe Izraelin.