Presidenti i Venezuelës, Nicolas Maduro, e ka akuzuar SHBA-në për “shpikje të një lufte të re”, pasi ajo urdhëroi dërgimin e anijes luftarake më të madhe në botë në Karaibe.
“Ata premtuan se nuk do të përfshiheshin asnjëherë më në një luftë, dhe tani ata po e fabrikojnë një luftë”, ka thënë ai.
Anija USS Gerald R Ford mund të mbajë deri në 90 avionë dhe vendosja e saj shënon rritje masive të fuqisë amerikane në rajon.
SHBA-ja ka kryer 10 sulme ajrore mbi anijet në zonë si pjesë e asaj që e quan luftë ndaj trafikantëve të drogës, raportoi BBC.
Presidenti amerikan, Donald Trump, e ka akuzuar Maduron se është lider i një organizate të trafikimit të drogës, të cilën ai e mohon, dhe ekziston shqetësimi në Venezuelë se grumbullimi i Ushtrisë Amerikane ka për synim heqjen e kundërshtarit të Trumpit nga pushteti.
SHBA-ja nuk e njeh Maduron si president të Venezuelës. Venezuela luan rol relativisht të vogël në tregtinë e drogës në rajon.
Pentagoni ka thënë se anija amerikane do të vendoset në zonën e Komandës Jugore të SHBA-së, që përfshin Amerikën Qendrore dhe të Jugut, si dhe Karaibet.