Macron: Nëse situata në Gazë s’përmirësohet, qëndrimi ndaj Izraelit duhet të ashpërsohet

Presidenti francez, Emmanuel Macron, ka thënë të premten se vendet evropiane duhet të ashpërsojnë “qëndrimet e tyre të përbashkëta” kundër Izraelit nëse situata humanitare në Rripin e Gazës nuk përmirësohet, raporton The Guardian.

Sipas raportimit të agjencisë franceze të lajmeve (AFP), Macroni ka bërë të ditur se duhen ndërmarrë veprime të menjëhershme gjatë “orëve dhe ditëve në vijim”.

Ai po ashtu ka ritheksuar se Franca do ta njohë një shtet palestinez, teksa e ka përshkruar këtë vendim jo vetëm si “një detyrë morale, por edhe domosdoshmëri politike”.

“Nëse nuk do të ketë një reagim në përputhje me situatën humanitare në Gaza në orët dhe ditët në vijim... do të na duhet të ashpërsojmë qëndrimin tonë të përbashkët”, ka thënë Macron gjatë vizitës së tij në Singapor.

Retorika e presidentit francez mbi situatën në enklavën palestineze ka qenë cak i kritikave nga kryeministri izraelit, Benjamin Netanyahu, i cili e pati akuzuar Macronin javën e kaluar, njëkohësisht edhe kryeministrin britanik, Keir Starmer dhe kryeministrin kanadez, Mark Carney, se “po i japin kurajë Hamasit”.