-
Përktheu:
Flutura Gashi-Mehmeti
- 6 prill 2024 11:40
- Shpërndaje në:
Organizata bamirëse e ushqimit "World Central Kitchen" (WCK) ka bërë thirrje për një hetim të pavarur për vrasjen e shtatë anëtarëve të stafit të saj nga sulmet izraelite me dron, të hënën në Gaza.
Kërkesa vjen pasi Forcat e Mbrojtjes të Izraelit (IDF) kanë thënë se "gabime të rënda" çuan në shënjestrimin fatal të punëtorëve, raporton BBC.
Një hetim ushtarak izraelit çoi në shkarkimin e dy oficerëve të lartë, të premten.
Megjithatë, themeluesja e grupit të ndihmës, Erin Gore ka thënë se ushtria izraelite (IDF) "nuk mund të hetojë në mënyrë të besueshme dështimin e saj në Gaza".
“Kërkimet e IDF-së për vrasjen e egër të kolegëve tanë përfaqësojnë rehati të ftohtë. Është ngushëllim i ftohtë për familjet e viktimave dhe familjen globale të WCK-së”, ka thënë ajo në një deklaratë.
Sipas saj, Izraeli duhet të ndërmarrë "hapa konkretë" për të garantuar sigurinë e punonjësve të ndihmës që veprojnë në terren në Gaza, ku disa organizata kanë pezulluar operacionet për shkak të vdekjeve.
Izraeli është nën presionin e partnerëve kryesorë perëndimorë për të publikuar gjetjet e plota të hetimit të tij, të cilat nuk janë bërë publike.
Sekretari amerikan i Shtetit, Antony Blinken ka thënë se ai kishte marrë raportin izraelit dhe se "po e shqyrtonte atë me shumë kujdes". Blinkeni ka bërë të ditur se SHBA-a do të "kërkojë të shohë jo vetëm hapat që po ndërmerren, por edhe rezultatet që vijnë prej tyre".
Administrata Biden po përballet me presion në rritje nga disa demokratë për mbështetjen e saj ushtarake ndaj Izraelit. Të premten, dhjetëra anëtarë të Kongresit, përfshirë ish-kryetaren e Dhomës së Përfaqësuesve, Nancy Pelosi, nënshkruan një letër duke i kërkuar presidentit Biden dhe sekretarit Blinken të "rishqyrtojnë" autorizimin e një transferimi të paketës së armëve në Izrael.
Letra kërkonte që SHBA-ja të ndalonte transferimet e mëtejshme të armëve, në pritje të një hetimi për sulmin ajror që vrau punonjësit e ndihmave, ose nëse Izraeli "dështon të zbusë mjaftueshëm dëmin ndaj civilëve të pafajshëm në Gaza".
Në harkun kohor prej katër minutash më 1 prill, shtatë punonjësit e ndihmave u vranë kur tre raketa shkatërruan makinat e tyre një nga një, teksa po merreshin me punë humanitare.
Ekipi i bamirësisë ishte autorizuar nga ushtria izraelite për të ndihmuar në transferimin e furnizimeve me ndihma nga bregu në një depo, por një sërë gabimesh dhe keqkomunikimesh nga ana e IDF-së rezultuan që ata të ngatërroheshin si operativë të Hamasit dhe të shënjestroheshin.
IDF-ja ka thënë se një "numër personash të armatosur" ishin në afërsi të autokolonës, por operatorët e dronëve gjurmuan gabimisht makinat që mbanin punonjës të ndihmës.
Ushtria kërkoi falje pasi pranoi se ushtarët e saj nuk respektuan protokollet dhe nuk iu dhanë informacione thelbësore për misionin e para-miratuar të ndihmës.
Vdekjet kanë kontribuuar në rritjen e presionit ndërkombëtar për mënyrën se si Izraeli po e drejton luftën.
Të enjten, presidenti Joe Biden i ka thënë kryeministrit izraelit, Benjamin Netanyahu se mbështetja e Washingtonit ishte e kushtëzuar me lejimin e më shumë ndihmave në Gaza dhe marrjen e masave shtesë për të mbrojtur punonjësit e ndihmës.
Izraeli më vonë deklaroi se kishte miratuar hapjen e dy rrugëve të reja për ndihmat humanitare në Gaza. Nuk është bërë e qartë se kur ato do të hapen apo nën çfarë kushtesh.
Pjesa më e madhe e Rripit të Gazës është shkatërruar gjatë sulmeve të forcave izraelite që kanë nisur më 7 tetor, pasi Hamasi kishte sulmuar jugun e Izraelit, duke lënë të vdekur 1,200 persona dhe duke marrë peng 253 të tjerë.
Më shumë se 33,091 kanë vdekur në Gaza që atëherë, sipas ministrisë së Shëndetësisë të Gazës.
