Izraeli bombardon periferitë e qytetit të Gazës, Netanyahu mbledhë kabinetin e sigurisë

Forcat izraelite kanë sulmuar priferitë e Qytetit të Gazës gjatë natës nga ajri dhe toka, duke shkatërruar shtëpi dhe duke dëbuar më shumë familje nga zona, teksa kabineti i sigurisë i kryeministrit Benjamin Netanyahu është mbledhur të dielën për të diskutuar një plan për të pushtuar qytetin.

Autoritetet lokale të shëndetësisë kanë thënë se të shtënat dhe sulmet ajrore izraelite kanë vrarë të paktën 18 persona të dielën, përfshirë 13 që u përpoqën të merrnin ushqim nga afër një vendi ndihme në Rripin qendror të Gazës, dhe të paktën dy në një shtëpi në Qytetin e Gazës.

Banorët e Sheikh Radwan, një nga lagjet më të mëdha të Qytetit të Gazës, kanë thënë se territori kishte qenë nën granatimet e tankeve izraelite dhe sulmeve ajrore gjatë gjithë të shtunës dhe të dielës, duke i detyruar familjet të kërkonin strehim në pjesët perëndimore të qytetit.

Ushtria izraelite ka përshkallëzuar gradualisht operacionet e saj rreth Qytetit të Gazës gjatë tre javëve të fundit, dhe të premten i ka dhënë fund pauzave të përkohshme në zonë që kishin lejuar shpërndarjen e ndihmave, duke e përcaktuar atë një "zonë të rrezikshme luftimi".

Një zyrtar izraelit ka thënë se kabineti i sigurisë i Netanyahut do të mblidhet të dielën në mbrëmje për të diskutuar fazat e ardhshme të ofensivës së planifikuar për të pushtuar Qytetin e Gazës, të cilin ai e ka përshkruar si bastionin e fundit të Hamasit.

Një ofensivë në shkallë të plotë nuk pritet të fillojë për javë të tëra. Izraeli thotë se dëshiron të evakuojë popullsinë civile përpara se të zhvendosë më shumë forca tokësore.

Rreth gjysma e më shumë se 2 milionë banorëve të enklavës ndodhen aktualisht në Qytetin e Gazës.

Sipas burimeve lokale, vlerësohet se disa mijëra janë larguar nga qyteti për në zonat qendrore dhe jugore të enklavës.

Ushtria izraelite i ka paralajmëruar udhëheqësit e saj politikë se ofensiva po rrezikon pengjet që mbahen ende nga Hamasi në Gaza. Protestat në Izrael që kërkojnë përfundimin e luftës dhe lirimin e pengjeve janë intensifikuar në javët e fundit.

Turma të mëdha demonstruan në Tel Aviv të shtunën në mbrëmje, dhe familjet e pengjeve protestuan jashtë shtëpive të ministrave të dielën në mëngjes.