Një sulm ajror izraelit goditi një kamp me tenda brenda një spitali në qendër të Gazës të dielën, duke vrarë dy palestinezë dhe duke plagosur 15 të tjerë. Sulmi goditi një nga disa tendat në oborrin e Spitalit të Martirëve Al-Aksa në Deir al-Balah, ku mijëra njerëz janë strehuar për muaj të tërë pasi u larguan nga shtëpitë e tyre diku tjetër në territorin e shkatërruar nga lufta.
Gazetarët po punonin nga tendat aty pranë dhe një reporter i Associated Press ishte dëshmitar i sulmit. Nuk kishte asnjë koment të menjëhershëm nga ushtria izraelite. Dhjetëra mijëra njerëz kanë kërkuar strehim në spitalet e Gazës që nga fillimi i luftës, duke i parë ato si relativisht të sigurta nga sulmet ajrore. Izraeli akuzon Hamasin dhe militantët e tjerë se veprojnë brenda dhe përreth objekteve mjekësore andaj trupat izraelite kanë bastisur një numër spitalesh në Gaza.
Trupat izraelite kanë bastisur Spitalin Shifa, më i madhi i Gazës, për gati dy javë dhe thonë se kanë zhvilluar beteja të rënda me militantët brenda dhe rreth kompleksit mjekësor. Ushtria thotë se ka vrarë shumë luftëtarë, duke përfshirë operativë të lartë të Hamasit.
