-
Nga:
Arsim Maxhera
- 15 janar 2025 08:45
- Shpërndaje në:
Trepça e Sigal Prishtina tradicionalisht kërkojnë trofetë e basketbollit kosovar. Por vetëm njëra prej këtyre dy skuadrave do të jetë në finale të Kupës së Kosovës për edicionin 2024/2025.
Dy skuadrat me traditë do të përballen në gjysmëfinale, ndërsa do të kenë dy ndeshje. Ndeshja e parë është të mërkurën prej orës 19:00 në palestrën “1 Tetori” në Prishtinë. Ndeshja nuk zhvillohet në Pallatin e Rinisë dhe Sportit, për shkak të një aktiviteti ndërkombëtar të hendbollit në atë palestër.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoPër këtë edicion ka ndryshuar formati i garës për Kupë. Më nuk zhvillohet i gjithë turneu në një vend, brenda një jave. Tetë skuadrat e Superligës e kanë nisur garën me ndeshjet çerekfinale. Edhe çerekfinalet u zhvilluan në dy ndeshje.
Trepça ishte bindëse ndaj Proton Cable Prizrenit në të dyja ndeshjet. Punë dukshëm më të vështirë kishte Prishtina. Skuadra e kaltër ndeshjen e parë e humbi nga Peja me rezultat 74:71, ndërsa në ndeshjen e kthimit, në Prishtinë, fitoi me rezultat 77:68. Ndeshjet çerekfinale janë zhvilluar në fillim të dhjetorit.
Tani është koha për ndeshjet e para gjysmëfinale, ndërsa ndeshjet e kthimit janë në fund të janarit.
Trepça është lidere në Superligë me 28 pikë, përkatësisht me bilanc prej 12 fitoresh e katër humbje. Prishtina është e katërta, ndërsa ka tetë fitore e tetë humbje.
Në kuadër të xhiros së katërt, Prishtina kishte fituar në Mitrovicë me rezultat 82:76. Në xhiron e 11-të Trepça fitoi në Prishtinë me rezultat 81:68. Shumëçka ka ndryshuar te skuadrat në krahasim me ato dy ndeshje, sidomos te Prishtina.
Në fundjavë, në kuadër të xhiros së 16-të, Trepça fitoi 91:68 ndaj Yllit, ndërsa Prishtina me shumë mund e mposhti Borën me rezultat 86:83.
Të mërkurën prej orës 19:00 është edhe ndeshja mes Vëllaznimit dhe Bashkimit. Këto dy skuadra u përballën të dielën në Prizren, ndërsa Bashkimi fitoi 84:73.
Prizrenasit synojnë tjetër fitore, por “kuqezinjtë” kanë plane të tjera dhe shpresojnë për vend në finale.
Bashkimi është i dyti në tabelë me 27 pikë, përkatësisht me 11 fitore e pesë humbje. Vëllaznimi renditet i pesti me 24 pikë. Gjakovarët kanë tetë fitore e tetë humbje.
Në çerekfinale Vëllaznimi e eliminoi Yllin. Në “Shani Nushi” fitoi me rezultat 100:82, ndërsa në Suharekë humbi 98:91. Bashkimi e eliminoi Borën duke e mposhtur me rezultat të thellë në të dy takimet.
Fituese në fuqi e Kupës së Kosovës është Trepça.