Artikull i përditësuar - Ashtu si pritej, përfaqësuesja e Kosovës në basketboll e ka mposhtur Shqipërinë të dielën mbrëma në Shkodër.
Ndeshja e vlefshme për raundin e parë të parakualifikimeve për “Eurobasket 2029” përfundoi me rezultatin 99:84 në të mirë të Kosovës.
Herët në ndeshje basketbollistët e Kosovës krijuan epërsi dyshifrore që e mbajtën më pas deri në fund. Kosova e fitoi çerekun e parë me rezultat 25:14, ndërsa të dytin me rezultat 19:14. Dallimi pas pjesës së parë ishte 16 pikë në të mirë të Kosovës.
Në pjesën e dytë të përzgjedhurit e Bujar Locit vetëm e mbajtën këtë epërsi.
Kapiteni Dardan Berisha e udhëhoqi Kosovën me 35 pikë, gjashtë asistime e tri kërcime. Erjon Kastrati kontribuoi në fitore me 21 pikë e dy kërcime, kurse Drilon Hajrizi i realizoi 15 pikë e shtatë kërcime. Lojë të mirë kishte edhe Dardan Kapiti me tetë pikë e tetë kërcime, kurse Mikaile Tmushiq i kishte shtatë pikë, katër kërcime e tri asistime.
Te kuqezinjtë më i miri ishte Juljan Hamati me 19 pikë e dhjetë kërcime. Eldi Hysa i kishte 12 pikë, nëntë asistime e pesë kërcime.
Në grup me Kosovën e Shqipërinë është edhe Sllovakia. Sllovakia tri ditë më parë fitoi 73:63 ndaj Shqipërisë. Më 27 shkurt të vitit të ardhshëm është ndeshja mes Kosovës dhe Sllovakisë. Ky cikël parakualifikues përfundon më 5 korrik të vitit të ardhshëm.
Kosova vlerësohej favorite e madhe ndaj Shqipërisë dhe këtë e dëshmoi me paraqitje në parket. Niveli i basketbollit në Kosovës është në nivel dukshëm më të lartë se në Shqipëri.
Kosova në epërsi bindëse pas pjesës së parë
Kosova po udhëheq bindshëm ndaj Shqipërisë pas pjesës së parë të ndeshjes në Shkodër.
Pas 20 minutave lojë, Kosova udhëheq me rezultatin 44:28. Kjo ndeshje i takon raundit të parë të parakualifikimeve për Eurobasket 2029.
Drilon Hajrizi po e udhëheq Kosovën me 11 pikë e pesë kërcime. 13 pikë i ka Dardan Berisha.