Nderohet Afrim Bunjaku, heroi i Kosovës

Mbi ngjyrat e flamurit shtetëror qëndronte figura e policit Afrim Bunjaku.

Ishte turneu i organizuar për ta përkujtuar heroizmin e tij në përvjetorin e 16-të të pavarësisë së Kosovës.

Afrim Bunjaku është heroi i fundit në vend, i cili u vra në detyrë më 24 shtator në Banjskë të Zveçanit.

Andaj, ky turne memorial ishte nismë e Klubit të Futsallit “Vushtrria” që mblodhi familjarë, miq, kolegë e qytetarë për ta nderuar figurën e tij.

“Do ta përkujtojmë si njeri që e deshi gjithnjë atdheun”, thoshin bashkëvendësit e tij.

Bashkëvendësi i tij, të cilin e kishte edhe shok klase, e kujton takimin e fjalët e fundit të policit Bunjaku.

Nismës për këtë organizim treditor iu bashkuan të gjithë në Vushtrri, thotë përfaqësuesi i klubit të futsallit.

Për të si i ri, thotë se do të jetë e pashlyeshme në histori figura e policit Bunjaku.

Në hapje të ngjarjes fjalën mori një nga koleget e të ndjerit, e cila iu drejtua familjarëve të tij.

Turneu po niste me djalin e Afrim Bunjakut, i cili u përcoll me duartrokitje.

Edhe nën emocione familjarët e Bunjakut, shprehen krenarë për heroizmin e tij.

Këtë përvjetor të shtetit do ta festojnë pa prezencën e tij, porse thonë se i mban krenarë rënia për vendin.

Turneu do të mbahet edhe në ditën festive, përvjetorin e 16-të të Kosovës shtet.