Ministri Ismaili mblodhi të gjithë drejtorët e klinikave për t’ua dhënë një lajm që e dinë të gjithë

Mblodhi të gjithë drejtorët e klinikave të QKUK-së, së bashku edhe me drejtorin e SHKUKS-së, Basri Sejdiu.

I gjithë ky takim, i cili zgjati rreth një orë, u thirr nga ministri në dorëheqje i Shëndetësisë, për të kumtuar lajmin tashmë publik, se mjekëve do t’u rriten pagat deri në fund të këtij viti.

Duke iu referuar Ligjit për Pagat, i cili ishte miratuar në maj të këtij viti, Uran Ismaili, i shoqëruar edhe nga ministri në dorëheqje i Financave, Bedri Hamza, edhe njëherë ua rikujtoi atyre siç tha, përpjekjet që ai dhe partia e tij bënë gjatë tërë vitit për t’i rritur pagat në këtë sektor.

E, këtu, Ismaili u lavdërua nga Bedri Hamza, njëherësh bashkëpartiaku i tij.

Derisa as Hamza nuk mbeti pa përmendur investimet dhe buxhetin që ndau qeveria në këtë mandat për sektorin e shëndetësisë.

E, ndonëse muajve të fundit ministri Ismaili intensifikoi vizitat e tij në klinikat dhe spitalet e QKUK-së duke përuruar shërbime dhe aparatura të reja në QKUK-së , madje i shoqëruar edhe nga bashkëpartiakë të tij, ai gjithë këto vizita nuk po i quan fushatë.

E kur vendi është në prag të shpalljes së zgjedhjeve nacionale, Ministri në dorëheqje, Uran Ismaili, përveç vizitave të shumta në sektorë të shëndetësisë, punën e tij si ministër, e promovon dhe është aktiv edhe në rrjetet sociale.