(Artikull i përditësuar me kërkimfaljen e Kurtit) - Kryeministri Albin Kurti ka gabuar në zgjidhjen e një detyre matematikore në inaugurimin e një shkolle në Komunën e Podujevës. Pavarësisht kësaj, të gjithë të pranishmit e kanë duartrokitur, përfshirë ministren e Arsimit, Arbërie Nagavci. E pasi gabimi u bë viral në rrjete sociale, kryeministri Kurti ka kërkuar falje.
Komuna e Podujevës inauguroi të mërkurën dy objekte të reja shkollore, në Dumosh dhe në Obrançë. Gjatë inaugurimit, kryeministri Kurti brenda një klase u përpoq të zgjidhte një problem matematikor.
Bëhet fjalë për ekuacion me një të panjohur (X).
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo-(3x) – (-5) = (-5x) – (-2) +3
Sipas kryeministrit Kurti, e që shihet edhe në fotografinë e publikuar nga faqja e Komunës së Podujevës në Facebook, X ka rezultuar të jetë i barabartë me 5.
Por zgjidhja është ndryshe. X në këtë rast është 0 (zero).
Kjo dëshmohet edhe nga prova e detyrës.
Cila duhet të jetë zgjidhja:
-(3X) – (-5) = (-5X) – (-2) +3
-3X + 5 = -5X + 2 + 3
-3X + 5X = 5 - 5
2X = 0
X = 0
Këtë e dëshmojnë edhe kalkulatorët online.
Në pamjet që qarkulluan online shihet se pasi Kurti “zgjidh” detyrën merr duartrokitje nga të pranishmit.
Pasi gabimi u bë viral, në një shkrim në Facebook, Kurti ka kërkuar falje. Ka thënë se nuk do të merrte notë kaluese, po të ishte nxënës.
“Ju falemnderit për mikpritjen e përzemërt në ndërtesën e re të shkollës suaj. Gëzimi juaj sot më mbushi me mall për bankat shkollore. Por, më duhet të them që tash jam i gëzuar që nuk isha nxënës në atë çast, sepse nuk do të merrja notë kaluese. Ekuacioni i thjeshtë matematikor m’u duk që në sekondën e parë që e ka zgjidhjen x=5; pra pesë, porsi pesëshet që ua dëshiroj juve. Po të mendoja pak, do ta shihja që zgjidhja e saktë është x=0, por në atë rast, nuk besoj që do të merrja mundin të merrja shkumësin e të shkruaja në dërrasën e klasës suaj. Ju kërkoj falje. Zgjidhja e atij ekuacioni, ashtu qysh ju e dini më mirë se kryeministri i juaj, është x=0”, ka shkruar Kurti.
Ndërkaq në njoftimin e Zyrës së Kryeministrit për inaugurimin e shkollave të reja, u tha se vlera financiare e shkollës “Musli Dumoshi” në fshatin Dumosh është mbi 584 mijë euro ndërsa vlera e investimeve në shkollën “Ali Hadri” është afro 500 mijë.
“Uroj që kjo shkollë, e çdo tjetër në vendin tonë, të jetë burim frymëzimi për çdo fëmijë, që të përqafojë dijen e të kërkojë më të mirën nga vetja, nga shoqëria, nga bota… e bashkë me rrjedhën e lumit të Dumnicës, të pandalshme i paçi edhe sukseset tuaja”, u shpreh kryeministri në fjalën e tij.