Lëvizja studentore në Serbi ka kërkuar të enjten dorëheqjen e zyrtarëve të lartë të policisë dhe të gjyqësorit, ndërsa po përgatitet të marrë pushtetin pas fitores historike në zgjedhjet e fundjavës së kaluar kundër ish-udhëheqësit, Aleksandar Vuçiq.
Në një konferencë për media, studentët u kanë bërë gjithashtu thirrje autoriteteve zgjedhore të Serbisë që të përmbyllin sa më shpejt procedurat pas votimit dhe të shpallin rezultatet përfundimtare të zgjedhjeve të së dielës. Kjo është e nevojshme që të mund të formohen Parlamenti dhe qeveria e re.
Lëvizja “Lista e Studentëve” ka fituar bindshëm në zgjedhjet parlamentare kundër Partisë Progresive Serbe të Vuçiqit, e cila e kishte qeverisur vendin për 14 vjet.
Megjithatë, autoritetet në largim vazhdojnë ta mbajnë pushtetin, pasi kalimi zyrtar i tij do të marrë disa javë.
“Ndryshimet po fillojnë tani”, ka thënë studenti Filip Uboviq në konferencën për media në Beograd.
“Institucionet u përkasin qytetarëve dhe ligji vlen për të gjithë. Interesi publik duhet të jetë mbi çdo individ dhe çdo parti politike”, ka shtuar ai.
Të enjten, studentët u kanë kërkuar nëpunësve publikë në institucionet shtetërore të parandalojnë çdo përpjekje të zyrtarëve në largim për të shkatërruar dokumentacionin ose provat e shkeljeve të mundshme.
Dyshimet për korrupsion shtetëror në projektet infrastrukturore, dy vjet më parë, shkaktuan një valë protestash në rrugë, pasi shembja e një strehe në një stacion treni në veri të Serbisë, pas punimeve të rinovimit, ka lënë të vdekur 16 persona.
Studentët udhëhoqën protestat dhe më pas sfiduan Vuçiqin në zgjedhjet e parakohshme të së dielës, duke e mposhtur atë.
Fitorja e studentëve konsiderohet historike, pasi shënon herën e parë që një lëvizje rinore e krijuar nga qytetarët arrin të rrëzojë një udhëheqës politik të konsoliduar. Ajo vjen gjithashtu në një kohë kur lëvizje të ngjashme po përhapen me shpejtësi në të gjithë Evropën.