-
Traduit par : Flutura Gashi-Mehmeti
- 2 novembre 2026 12h01
- Partager à:
Autoritetet në Ukrainë dhe Rusi kanë thënë se aplikacionet e tyre për njoftimet emergjente në telefona janë vënë në shënjestër të sulmeve kibernetike të dielën vonë, ndërsa përdoruesit në Ukrainë morën paralajmërime të rreme për nivele rrezikshëm të larta të rrezatimit në kryeqytetin Kiev.
Në një postim në Telegram të dielën vonë, kanali ukrainas për paralajmërimet e sulmeve ajrore ka thënë se "persona të paautorizuar" kishin ndërhyrë në funksionimin e aplikacionit dhe se shërbimi ishte pezulluar përkohësisht. Ai ka paralajmëruar përdoruesit që të mos hapnin lidhjet në "njoftimet e dyshimta".
Autoritetet ukrainase kanë thënë se aplikacioni, tek i cili qytetarët mbështeten për të gjetur strehim gjatë sulmeve të përditshme me raketa dhe dronë nga Rusia, është rikthyer në funksion gjatë natës.
Njoftimet e rreme përmbanin pretendime për nivele të larta rrezatimi, kërcënim kimik dhe trazira publike në Kiev. Ato ishin shkruar në anglisht, me gabime drejtshkrimore dhe gramatikore, si dhe në një përzierje të gjuhës ruse dhe ukrainase.
Njëri prej postimeve të rreme përmendte grupin e hakerëve Hitcore. Kanali rus në Telegram, Mash, i cili ka lidhje me shërbimet e sigurisë, ka thënë se kishte biseduar me përfaqësues të Hitcore dhe se ata kishin marrë përgjegjësinë për sulmin. Ky pretendim nuk është verifikuar në mënyrë të pavarur, raporton AP.
Qendra Shtetërore e Ukrainës për Kundërvënien ndaj Dezinformimit ka raportuar sulmin dhe u ka bërë thirrje përdoruesve të ndjekin kanalet e emergjencave në rrjetet sociale dhe të mbështeten te sinjalizimet fizike derisa të zgjidhej problemi me sulmin kibernetik.
Yurii Ihnat, zëdhënës i Komandës së Forcave Ajrore të Ukrainës, ka thënë se sulmi kibernetik nuk kishte ndikuar në operacionet e sigurisë dhe mbrojtjes së vendit, pasi aplikacioni është i ndarë nga sistemet e komandës ushtarake.
Ihnat i ka thënë televizionit privat ukrainas 1+1 se Forcat Ajrore vazhdojnë të raportojnë kërcënimet në kohë reale përmes kanaleve të pavarura të komunikimit, përfshirë platformat e njohura të rrjeteve sociale.
Në Rusi, zyrtarët kanë thënë të hënën se hakerët kishin dërguar njoftime të rreme emergjente pasi kishin arritur të depërtonin në aplikacionin celular të Ministrisë së Emergjencave.
Ministria nuk ka bërë të ditur se kush qëndronte pas sulmit. Në një deklaratë, ajo siguroi qytetarët se sistemi i përgjithshëm i paralajmërimeve publike po funksiononte normalisht dhe se aplikacioni celular ishte vetëm një shërbim shtesë, krahas njoftimeve të dërguara përmes SMS-ve, transmetimeve mediatike, sirenave dhe altoparlantëve komunalë.
Zëdhënësi i Kremlinit, Dmitry Peskov, ka thënë se të gjitha institucionet shtetërore ruse janë vazhdimisht nën kërcënimin e sulmeve kibernetike, përfshirë një numër gjithnjë e më të madh sulmesh që përdorin inteligjencën artificiale.
"Të gjitha institucionet qeveritare duhet të ndërmarrin hapa për të përmirësuar sigurinë kibernetike të burimeve tona digjitale", ka thënë Peskov.