-
Par:
Elda Islami
- 25 octobre 2026 19:27
- Partager à:
Mbi katër milion euro janë dëmet e shkaktuara në kulturat bujqësore shkaktuara nga vërshimet dhe breshëri vetëm në Komunën e Istogut dhe Pejës. Por para fundit të vitit këto dhe komunat të tjera pritet të subvencionohen nga ekzekutivi ka bërë të ditur ministri i Bujqësisë, Armend Muja
Subvencionimi dhe grantet për dëmet në kulturat bujqësore të shkaktuara nga vërshimet dhe breshëri gjatë muajve korrik e gusht të këtij viti pritet të hapet para fundit të vitit. Ka njoftuar ministri i Bujqësisë, Armend Muja.
Sipas tij tashmë komunat e kanë përfunduar vlerësimin e dëmeve dhe ia kanë dorëzuar ato, Agjencisë për Menaxhimin e Emergjencave.
“Komunat, përfshirë edhe Istogun, i kanë bërë vlerësimet e dëmeve dhe i kanë dërguar ato në Agjencinë për Menaxhimin e Emergjencave (AME). Roli ynë tani është te pjesa e rigjenerimit të prodhimit përmes subvencioneve dhe granteve për kulturat e dëmtuara. Këto do të hapen para fundit të vitit, pikërisht për t’u dalë në ndihmë fermerëve në nevojë”, tha Muja.
Gjatë muajve të verës, korrik e gusht, vërshimet dhe breshëri goditën disa komuna të Kosovës, përfshirë Istogun, Pejën, Suharekën e të tjera, duke shkaktuar dëme në kulturat bujqësore të shumë fermerëve.
Njëra ndër komunat më të prekura ishte Istogu, ku si pasojë e reshjeve të shumta atmosferike u dëmtuan disa nga kulturat kryesore bujqësore, si shalqiri, specat, misri dhe perime të tjera.
Drejtori i Bujqësisë në këtë komunë, Artan Gegaj, ka bërë të ditur se vlera e dëmeve arrin në rreth 3 milionë euro.
“Në Komunën e Istogut janë rreth 3 milionë euro dëme, dhe vlerësimi ka zgjatur rreth një muaj”, tha Gegaj.
Me fatkeqësi natyrore u përball edhe Komuna e Pejës. Zëdhënësi i kësaj komune, Valmir Deçani, ka njoftuar se vlera totale e dëmeve është 1 milion e 160 mijë e 903 euro.
Nga breshëri gjatë muajve të verës janë prekur edhe komunat e Klinës dhe Deçanit.
KOHA ka kontaktuar edhe komunat e tjera të prekura, por gjatë së dielës ato nuk kanë qenë të qasshme për të dhënë informata.
Vlerësimi i dëmeve në komunat e prekura kishte nisur rreth një javë pas fatkeqësive natyrore. Asokohe, fermerët ishin ankuar për mungesën e kompensimit për dëmet e shkaktuara nga vërshimet paraprake.
Edhe në fillim të vitit 2026 pati vërshime si pasojë e motit të ligë. Komunat i kanë kryer vlerësimet e dëmeve, por kompensimi ende nuk është realizuar.