Gazetarja Saranda Ramaj ka thënë se diskutimi i zhvilluar në Kuvendin e Kosovës për vrasjen e Arlinda Zekajt e ka irrituar më shumë sesa momenti kur kishte marrë vesh për vrasjen dhe identitetin e viktimës.
Ajo ka kritikuar politizimin e diskutimit për dhunën ndaj grave, duke thënë se një ditë që duhej të shërbente për reflektim, zi dhe bashkim kundër dhunës me bazë gjinore, u shndërrua në përplasje politike mes palëve.
“Diskutimi i mbrëmshëm në Kuvend më irritoi, do të thotë, isha më e irrituar pas diskutimit sesa një natë para, kur e kuptova vrasjen dhe kush është viktima. Një ditë shumë e rëndësishme që do të duhej të ishte ditë zie, ditë reflektimi, një farë dite përbashkimi që dhuna në baza gjinore ish dasht me na bashku, pasi nuk i prek votuesit e një partie, na prek secilin prej nesh. Diskutimi dje mori karakter politik, ia orientonin gishtin njëri-tjetrin gishtin kush ka bërë më shumë e kush më pak. Do të ketë Kuvendi raste të tjera për të diskutuar për këto çështje”, ka thënë Ramaj në “Konfront” të KTV-së.
Ajo ka thënë se në Kosovë vrasjet e grave po shndërrohen në sensacion nga mediat, hetuesit, politika dhe rrjetet sociale.
“Fatkeqësisht, në Kosovë vrasja e grave po kthehet në sensacion. E kthen media, hetuesit, politika, rrjetet sociale. Duam me sensacionalizu në mënyrë të padrejtë”, shtoi Ramaj.
Sipas saj, çështja kryesore nuk është domosdoshmërisht mungesa e infrastrukturës ligjore për trajtimin e rasteve të vrasjeve dhe dhunës me bazë gjinore, por efikasiteti i mekanizmave ekzistues.
Gazetarja ka ngritur shqetësimin edhe për mentalitetin patriarkal, duke theksuar se ndryshimi i tij është i nevojshëm jo vetëm në media dhe politikë, por veçanërisht në polici, prokurori dhe gjykata.
“Shqetësim është se nuk e di qysh do të ndërrojë ky mentalitet patriarkal edhe në media, edhe në politikë, por më e rëndësishme në polici, prokurori e gjykata”, deklaroi Ramaj.
