Kryeministri i Shqipërisë, Edi Rama ka thënë se nuk e ka ndërmend të largohet nga detyra që mban deri në përfundim të mandatit.
Mëngjesin e sotëm, Rama sërish i ftoi për dialog në ulëse betoni protestuesit. Deri më tani kjo kërkesë nga ata e tyre është refuzuar.
“Unë jam dhe do jem në krye të detyrës sime deri në ditën e fundit me njerëzit e zakonshëm të Shqipëri. Ky mishmash ka një devizë përbashkuese, ne jemi populli, ne s’e durojmë dot më këtë sistem, s’e duam më këtë qeveri, s’e pranojmë më këtë kryeministër. Jep dorëheqjen, bindju popullit! Ky mishmash s’ka asnjë lidhje me popullin dhe asnjë autorizim për të folur në emër të popullit, sepse populli flet vet me votën e tij”, ka deklaruar Rama.
Krahas kësaj, Rama ka prezantuar projektbuxhetin për vitin 2027 në vlerë 10 miliardë euro, apo më i larti deri më tani siç kanë raportuar mediat e Shqipërisë dhe ndryshimet e parapara.
Si rrjedhojë, Rama ka thënë se janë gati që ta ulin normën e TVSH-së për ushqimet bazë nga 20 në 6% për 54 produkte.
“Duam sa më shumë të pasur në Shqipëri, sepse problemi nuk janë të pasurit, por hendeku mes atyre që kanë më shumë dhe atyre që kanë më pak. Falë rritjes së ekonomisë jemi gati për të hedhur një hap të shumëdëshiruar dhe shumëpritur, ulim normën e TVSH-së për ushqimet bazë, nga 20 në 6% për 54 produkte”, ka thënë Rama. “Vetëm me këtë lëvizje shtojmë në arkën e familjeve shqiptare rreth 150 milionë euro në vit, që më parë i kalonin shtetit. Do të garantojmë që ulja të mbrohet nga abuzuesit”.
Gjithashtu Rama ka thënë se do të rritet me 1% norma standarde e TVSH-së, si një rishpërndarje e ndershme. Ndërsa nuk do të rritet norma e tatim fitimit të sipërmarrjes, që mbetet në 15%. “Ne e tatojmë biznesin e madh në normën më të lartë në Ballkanin Perëndimor. Por rrisim tatimin e dividentit nga 8 në 15%”, tha Rama.
Kryeministri konfirmoi uljen e pragut të aplikimit të TVSH-së në 5 milionë lekë. “Kjo lëvizje duhet të shërbejë edhe si paralajmërim për bizneset nën 5 milionë lekë, që të mos luajnë me faturat”, ka deklaruar Rama.
Rama shtoi se do të rritet norma e TVSH-së në hoteleri, nga 6% në 10%, duke përjashtuar agroturizmin. “Do të vendosim supertaksë prone për ata që blejnë dhe mbajnë apartamente bosh dhe refuzojnë t’i japin me qira. Supertaksë prone për vilat në bregdet dhe një çmim i shumëfishuar për ujin e pishinave. Supertaksë edhe për makinat e luksit që hyjnë nga jashtë”.
Në aspektin më social, projektbuxheti parashikon afro 35 miliardë lekë për pensionistët për vitin 2027. Indeksimi i pensioneve do të bëhet në muajin prill 2027 me një vlerë 1.35 miliardë lekë. Nga janari do të dyfishohet vlera e bonusit mujor të pensionistëve, me kosto prej 20 miliardë leke, si dhe 13 miliardë lekë do të kalojë në fondin special në Bankën e Shqipërisë.
Siç parashihet, pensionet urbane të plota me vlerë deri 40 mijë lekë do të marrin 3600 lekë në muaj. Pensionet urbane të pjesshme me vlerë deri 22 mijë lekë do të marrin 1600 lekë, pensionet rurale me vlerë deri 18 mijë lekë në muaj përfitojnë bonus 2000 lekë, gjithashtu dyfish do marrin edhe pensionet familjare (1400) dhe ato të invaliditetit (1200 lekë).
Në mesin e fushave që do të investohet është edhe ajo e mbrojtjes.
“Financohet plotësisht angazhimi me NATO për arritjen e nivelit 5% të PBB të shpenzimeve për mbrojtjen. Në 2027, shpenzimet e mbrojtjes kapin nivelin e 2.35% te PBB ose 68.8 miliardë lekë”, thuhet tutje.
Investime janë paraparë edhe në arsim, shëndetësi e bujqësi.