Pas maratonës gjashtëditore të shfaqjes, festivali ndërkombëtar i filmit në Prishtinë, “PriFest” ka ndarë çmimet për filmat më të mirë. Sivjet në kategorinë kryesore – atë të filmit të gjatë ballkanik – kanë triumfuar dy filma, “Toka brenda meje” nën regji të Fisnik Maxville dhe “Blaga’s Lessons” nën regji të Stephan Komandarev. Përderisa i pari gërmon mbi identitetin dhe përkatësinë e individëve në raport me atdheun, i dyti merret me fatkeqësitë në kohën kur teknologjia është bërë e domosdoshme.
Të dielën mbrëma “PriFest” ashtu siç është zakon ka bashkuar kineastë vendorë e të huaj para “Kino Armatës”. Në një ambient festiv edhe janë ndarë çmimet.
Regjisori Maxville ka thënë të jetë i nderuar me këtë çmim për filmin më të mirë.
Ky çmim është ndarë nga kryeministri i Kosovës, Albin Kurti. Duke pasur parasysh që çmimi mban emrin e producentes e themelueses së festivalit, Vjosa Berisha, Kurti ka folur edhe për Berishën e cila vdiq vjet.
Por me kolegun e tij bullgar, Stephan Komandarev, Maxville e ka ndarë edhe çmimin për regjinë më të mirë.
Në këtë ceremoni aktorja më e mirë është shpallur Eli Skorcheva për rolin e saj në filmin “Blaga’s Lessons”. Kurse Çmimi për aktorin më të mirë është ndarë midis Edgar Morais dhe Rafael Morais, për rolet e tyre në filmin shqiptar “Një filxhan kafe dhe këpucë të reja veshur”, kandidat i Shqipërisë për nominim për “Oscar”.
Çmimi për arritjen vjetore në kinematografi, “Hyjnesha e artë” i është ndarë producentit Valon Bajgora.
Si festival që ka edhe kategorinë e filmave të metrazhit të mesëm, “PriFest” si filmin më të mirë të kësaj kategorie e ka shpallur “Si në vaj” nën regji të Aulona Selmanit. Rrëfimi i nënës që sakrifikon gjithçka për fëmijët e saj në këtë film vjen me portretin e Ilire Vincës.
Ndërsa Ilire Vinca këtë çmim ua ka dedikuar të gjitha nënave.
Çmimi special i jurisë për filmat e shkurtër është ndarë për “Home of the Heart” nën regji të Sarah Saidan, kurse Çmimi për filmin e shkurtër i ka takuar “Roadtriper” nën regji të francezit Christophe Granger.
Te “Best Pich” sivjet ka marrë pjesë Qendra Kinematografike e Kosovës duke përkrahur projektet e reja. Sipas drejtoreshës së QKK-së, Blerta Zeqiri, “PriFest” është një vlerë e shtuar e kinematografisë në Kosovë.
Për një javë, “PriFest” ka bashkuar aktorë vendorë e të huaj të kinematografisë, duke dhënë premiera kosovare. Pos kësaj debatet e aktivitet e tjera e kanë plotësuar mozaikun e Festivalit.
© KOHA. Të gjitha të drejtat janë të rezervuara.
