-
Nga:
BBC
- 11 shkurt 2023 10:48
- Shpërndaje në:
Fëmijët e plagosur në spitalin e qytetit të Adanas në Turqi janë shumë të vegjël për të ditur se sa shumë kanë humbur.
Pashë mjekët në njësinë e kujdesit intensiv duke ushqyer me shishe një vajzë gjashtë muajshe të plagosur, prindërit e së cilës nuk mund të gjenden. Ka qindra raste të tjera të fëmijëve të paidentifikuar, prindërit e të cilëve janë të vdekur ose të pagjurmueshëm.
Tërmeti u rrënoi shtëpitë dhe tani u ka hequr edhe emrat.
Dr Nursah Keskin kap dorën e vogëlushes në kujdesin intensiv - e njohur vetëm nga etiketa në shtratin e saj: "Anonime". Ajo ka fraktura të shumta, sy të zi dhe fytyrën e ka të mavijosur keq; por ajo kthehet dhe na buzëqesh.
"Ne e dimë se ku u gjet dhe si arriti këtu. Por ne po përpiqemi të gjejmë një adresë. Kërkimi po vazhdon”, shprehet Dr.Keskin, një pediatër dhe zëvendësdrejtor në spital.
Kjo vajzë e vogël - që besohet të jetë pesë ose gjashtë vjeç ka një traumë në kokë dhe fraktura të shumta
Shumë nga këto raste janë fëmijë të shpëtuar nga ndërtesat e shembura në rajone të tjera. Ata u sollën në Adana sepse spitali është ende në këmbë. Shumë qendra të tjera mjekësore në zonën e fatkeqësisë kanë rënë ose janë dëmtuar. Adana u bë një qendër shpëtimi.
Në një transferim, foshnjat e porsalindura u dërguan këtu me urgjencë nga një maternitet në një spital të goditur rëndë në qytetin e Iskenderun.
Zyrtarët turq të shëndetësisë thonë se në të gjithë zonën e fatkeqësisë së vendit aktualisht ka më shumë se 260 fëmijë të plagosur, të cilët nuk kanë qenë në gjendje t'i identifikojnë.
Kjo shifër mund të rritet ndjeshëm pasi të arrihen më shumë zona dhe shkalla e të pastrehëve të bëhet e ditur plotësisht.
Dr.Ilknur Banlicesur, një kirurge pediatrike, thotë se shumë fëmijë nuk mund të flasin për shkak të tronditjes
Unë ndjek Dr.Keskin nëpër korridoret e mbushura. Të mbijetuarit e tërmetit shtrihen në karroca, të tjerët janë të mbështjellë me batanije në dyshekë në një zonë emergjence. Nisemi drejt repartit të kirurgjisë, i mbushur gjithashtu me fëmijë të plagosur.
Takojmë një vajzë për të cilën mjekët thonë se është pesë ose gjashtë vjeç. Ajo është duke fjetur dhe e lidhur me pikat intravenoze. Stafi thotë se ajo ka një traumë në kokë dhe fraktura të shumta.
E pyes nëse ka mundur t'u tregojë emrin e saj.
"Jo, është vetëm kontakt me sy dhe gjeste”, shprehet Dr.Ilknur Banlicesur, kirurge pediatrike.
"Për shkak të tronditjes, këta fëmijë nuk mund të flasin vërtet. Ata i dinë emrat e tyre. Pasi të stabilizohen disa ditë më vonë, ne mund të flasim”, shpjegon ajo.
Zyrtarët shëndetësorë janë përpjekur të përputhin fëmijët e paidentifikuar me adresat. Por shpesh adresat nuk janë gjë tjetër veçse rrënoja. Në të paktën 100 raste, fëmijë pa emër tashmë janë marrë në kujdes.
Mediat sociale turke janë mbushur me postime që tregojnë fëmijët e humbur, duke dhënë detaje se në cilin kat jetonin në ndërtesat e shembura, duke shprehur shpresën se mund të ishin shpëtuar dhe dërguar në spital.
Të afërmit e mbijetuar dhe zyrtarë të ministrisë së Shëndetësisë kanë udhëtuar mes qendrave mjekësore duke u përpjekur t'i gjejnë ata.
Në spitalin e Adanas vazhdojnë të vijnë të plagosurit. Ata janë të tronditur dhe të rraskapitur.
Të gjithë këtu janë të mbijetuar, pacientë dhe mjekë njësoj.
Dr.Keskin humbi të afërmit nga tërmeti dhe u strehua në spital me fëmijët e saj pasi pati tërmete të tjera më të vogla.
E pyes si po e përballon.
“Unë jam mirë, po përpiqem të jem mirë, sepse fëmijët kanë vërtet nevojë për ne. Por unë them faleminderit Zotit, unë i kam akoma fëmijët e mi. Nuk mund të mendoj për një dhimbje më të madhe për një nënë se humbja e fëmijës së saj”, shprehet ajo.
Pranë nesh, pacientë të rinj në reparte presin që prindërit e tyre të kthehen. Disa janë ribashkuar. Por pjesa tjetër mbeten fëmijët anonimë të tërmetit.
