Johnsoni e mbijeton mocionin e mosbesimit

211 deputetë mbështetën Johnsonin në votim, derisa kundër votuan 148 të tjerë. Votimi u mbajt disa ditë, pasi sondazhi i 25 majit tregoi se 65% e britanikëve thanë që Boris Johnson do të duhej të jepte dorëheqje për gjetjet e raportit të Sue Greyt për ndejat e mbajtura në dhe rreth Downing Street gjatë bllokimeve zyrtare të Covid-19

Boris Johnson do ta vazhdojë punën e tij si kryeministër i Britanisë, por autoriteti i tij ka rënë pas fitores së ngushtë të votëbesimit për udhëheqjen e Qeverisë së shtetit ishullor.

211 deputetë mbështetën Johnson në votim, derisa kundër votuan 148 të tjerë.

Ai ka të ngjarë të kërkojë ta shohë rezultatin si mundësi për të çarë përpara, por diferenca e vogël e fitores do të thotë se siguria e tij në detyrë mbetet në rrezik.

Para votimit, gjashtë në dhjetë të rritur britanikë thanë se anëtarët konservatorë të Parlamentit do të duhej të votonin për ta shkarkuar Johnsonin, thuhej në një sondazh të ri të parakohshëm të kryer të hënën.

Agjencia britanike e kërkimit të tregut Opinium anketoi 2062 të rritur britanikë përpara votimit të besimit të së hënës në mbrëmje.

Sondazhi zbuloi se 28% e votuesve mendojnë se deputetët konservatorë duhet të votojnë për të mbajtur Johnson në krye, ndërsa 59% thanë se duhet të votojnë për ta hequr atë.

Anketimi zbuloi gjithashtu se 58% e votuesve mendojnë se lidershipi i Johnsonit ka qenë i keq për vendin, krahasuar me 37% që mendojnë se ka qenë i mirë.

Megjithatë, shumica e votuesve konservatorë thanë se deputetët konservatorë duhet të votojnë për të mbajtur kryeministrin, me vetëm 34% të votuesve konservatorë që duan që ai të largohet.

Margjina e gabimit për sondazhin është plus ose minus 2.16 pikë.

Sondazhi i Opinium në lidhje me votimin e besimit është në përputhje me sondazhet e mëparshme që zbuluan se shumica e britanikëve thanë se kryeministri duhet të japë dorëheqjen për skandalin "Partygate".

Sipas një sondazhi të menjëhershëm të 25 majit nga Savanta ComRes, 65% e britanikëve thanë se Boris Johnson duhet të japë dorëheqjen për gjetjet e raportit të Sue Grey për ndejat e mbajtura në dhe rreth Downing Street gjatë bllokimeve zyrtare të Covid-19.

Me fatin e kryeministrit të tij në duart e miqve dhe armiqve të tij konservatorë, Johnson para votimit u është lutur deputetëve konservatorë që ta mbështetin.

Në një letër drejtuar anëtarëve të partisë përpara votimit, siç raportohet nga PA Media, ai kërkoi "shansin e artë për ta lënë këtë pas nesh" dhe për të ecur përpara si "një parti e bashkuar", duke reflektuar mbi rrugëtimin e partisë në pushtet përmes Brexit-it, pandemisë Covid-19 dhe luftës Rusi-Ukrainë.

Johnson përshkroi gjithashtu planet që synon të përmbushë nëse mbetet në detyrë.