Serbët e Kosovës të (pa)organizuar për zgjedhjet në Serbi

Nesër në Serbi mbahen zgjedhjet presidenciale e parlamentare. Pasi Kosova ndaloi organizimin në territorin e kësaj të këtyre zgjedhjeve, qytetarët serbë të Kosovës, të drejtën e tyre të votës mund ta ushtrojnë në njërën nga katër komunat në jug të shtetit fqinj. Por të shtunën, në komunën me shumicë serbe afër kryeqytetit, shumica e tyre u shprehën të painteresuar

Një pano e presidentit aktual të Serbisë, Aleksandër Vuçiq, e vendosur në qendër Graçanicës, rreth dhjetë kilometra larg Prishtinës, të shtunën mbante numrin 147, e që dukej se ishte vendosur së fundmi. Me këtë numër, Vuçiqi garon të dielën për të siguruar edhe një mandat si president i Serbisë

Por, banorët e Graçanicës, sikurse edhe serbët e tjerë në Kosovë, për të ushtruar të drejtën e tyre të votimit në zgjedhjet presidenciale e parlamentare, do t’u duhet të udhëtojnë për në Serbi. Kjo pasi praktika e zbatuar ndër vite, kur proceset zgjedhore të Serbisë janë lejuar të mbahen edhe në Kosovë, nuk do të vlejë kësaj here.

Një gjë e tillë, sikurse ishte vepruar edhe me referendumin, nuk është lejuar nga institucionet e Kosovës. Por në referendum ka pasur organizime autobusësh për të votuar në komunat jugore të Serbisë.

Por, për zgjedhjet në Serbi, disa nga serbët e Graçanicës kanë thënë se s’janë të interesuar.

“Nuk më intereson politika!”, ka qenë përgjigja e një qytetareje.

“Nuk e di, nuk besoj”, ka thënë një tjetër qytetar.

Mosdakordimin mes dy shteteve për zgjedhjet e veçanërisht kundërshtimin e Qeverisë së Kosovës, vendet e QUINT-it, nuk e pritën mirë, derisa u deklaruan “të zhgënjyer”.

Në një reagim të përbashkët, dy javë më parë, Franca, Gjermania, Italia, Britania e Madhe dhe Shtetet e Bashkuara të Amerikës deklaruan se vendimi i Qeverisë së Kosovës për një gjë të tillë minon aspiratat evropiane të Kosovës.

“E kuptojmë se është e drejtë e Qeverisë së Kosovës të vendosë nëse duhet apo jo të japë leje për organizimin e zgjedhjeve të një shteti tjetër. Përderisa e vlerësojmë gatishmërinë e Serbisë për të gjetur një zgjidhje, me zhgënjim të madh marrim shënim vendimin e Qeverisë së Kosovës për të refuzuar propozimin konstruktiv të prezantuar nga QUINT-i”, thuhej në reagimin e QUINT-it.

Por, disa prej përfaqësuesve të partive opozitare kanë thënë se institucionet e Kosovës do të duhej të kishin koordinim më të mirë me shtete e QUINT-it,

Sipas deputetit të Lidhjes Demokratike të Kosovës, Driton Selmanaj, për herë të parë, me refuzimin e propozimit të QUINT-it nga Qeveria e Kosovës, ato kanë mbajtur anën e Serbisë.

“Çdo çështje që lidhet me veriun e Kosovës duhet pasur shumë kujdes e të kemi koordinim me shtetet mike. Mos harroni për herë të parë po ndodh në Kosovë në 20 vjetët e fundit që shtetet e QUINT-it po dalin në anën e Serbisë për një çështje të caktuar”, ka thënë ai në një deklaratë për “Ekonomia Online”.

Deputetja e PDK-së, Ariana Musliu-Shoshi, ka thënë se duhet pasur kujdes në veprime për shkak të miqësisë me shtete e QUINT-it.

Për dallim nga LDK-ja dhe PDK-ja, Aleanca për Ardhmërinë e Kosovës e ka mbështetur vendimin e Qeverisë për të mos lejuar mbajtjen e zgjedhjeve të Serbisë në Kosovë.

“Të mbrojmë ligjet e Kosovës, Kushtetutën, qytetarin e Kosovës dhe integritetin e vendit. Në këtë drejtim AAK-ja e mbështet Qeverinë”, ka deklaruar deputeti i AAK-së, Pal Lekaj.

Sipas vendimit të Komisionit të Zgjedhjeve në Serbi, serbët e Kosovës mund të votojnë në katër komunat jugore, Kurshumli, Novi Pazar, Rashkë e Vranjë.