Të punosh sot në Kosovë, ndonëse në kushte çnjerëzore, është privilegji racor, pasi në vendin tonë të jesh grua, person LGBTI+, i ndonjë race tjetër apo me nevoja të veçanta, je i papërshtatshëm edhe për t’u konsideruar si punëtore. Kështu u tha në protestën e thirrur “Liri, Barazi, Solidaritet”, të organizuar nga blloku anti-kapitalist i Kolektivit për Mendim dhe Veprim Feminist, me rastin e 1 Majit, Ditës Ndërkombëtare të Punëtorëve.
“Poshtë oligarkët ekonomikë”, “Puna e paguar e grave mbanë shtetin”, “Puna në Kosovë dëmton seriozisht shëndetin”, ishin disa prej pankartave që mbanin në duar protestuesit. Protesta nisi nga sheshi “Zahir Pajaziti”, për të vazhduar te Ministria e Punës dhe Mirëqenies Sociale, e deri te Qeveria e Kosovës.
Njëra nga anëtaret e Kolektivit për Mendim dhe Veprim Feminist, ka thënë se protesta është qëndrim politik sepse punëtorët janë ata që e mbajnë gjallë Kosovën.
Ajo është shprehur se që dy dekada punëtorët rëndohen nga shtypja e korporatave dhe asgjësimi institucional.
“Ky sistem kapitalist i qeverisur nga një mendësi neoliberale, e cila copëzon njeriun, është duke degraduar çdoherë e më shumë punëtorin. Përveç plaçkitjes së vazhdueshme të punës, ky sistem është duke e lenë pa shpresë e në mjerimin punëtorin. ...Të jesh grua, person LGBTI+, i ndonjë race tjetër, me nevoja të veçanta, je i papërshtatshëm edhe për t’u konsideruar si punëtor, kjo pasi ky sistem në të cilin ne gjendemi e që është sistemi patriarkale-kapitalist, është sistem i dhunës, i përçarjes, disiplinimit e shtypjes së shumicës në favor të pakicës. Ky sistem nuk mund të sanohet me asnjë ndërhyrje neoliberale, dominonte në politikat e pas-luftës në Kosovë, të cilat veç synojnë të blejnë fare lirë heshtjen e punëtorëve”, tha ajo.
Një tjetër protestues i kësaj organizatë, ka thënë që sistemi ekonomik e politik në Kosovë është racist e diskriminues. Ai ka shtuar që shtypja klasore e racore, janë produkte të një sistemi kapitalist dhe që shumë punëtorë po ngacmohen dhe po vriten në vendet e punës.
Protestës iu bashkua edhe 15-vjeqarja, Esra Syla, e cila edhe pse nuk kishte lindur në Kosovë, akuzoi ish-drejtuesit e institucioneve për degradimin e shtetit të Kosovës.
Protestuesit shtuan se do të vazhdojnë të protestojnë deri në projektimin e një organizimi politik e ekonomik, ku punëtorët janë të lirë nga çdo forme e shtypjes. /ksp
{gallery}
