Historia e krijimit të flamurit të Kosovës nga Muhamer Ibrahimi

Prapa po valon krijimi i tij. Muhamer Ibrahimi është ideatori i flamurit, i cili më 2008 fitoi konkursin për përzgjedhjen e flamurit.

Ai thotë se në mbi 5000 punimeve, flamuri që sot na përfaqëson arriti të zgjidhej fitues.

“Ideja për flamur ka qenë jo vetëm e imja, por edhe e shumë krijuesve dhe shumë politikanëve ose njerëzve publikë që Kosova duhet të ketë një flamur, sepse nuk munden dy shtete të përfaqësohen me një flamur. Fati deshi që unë e fitova konkursin dhe ky flamur që është sot ka fituar në mesin e 5000 punimeve”, ka thënë ai.

Harta me ngjyrë ari e gjashtë yjet janë elementet kryesore të simbolit.

Ibrahimi përshkruan domethënien e tyre dhe arsyen e ngjyrave të përzgjedhura.

“Konkursi ka pasur disa kritere, të cilat janë: flamuri i Kosovës nuk duhet ta përfaqësojë ndonjërin nga etnitë ose nga kombet, nuk duhet t’u përngjajë flamujve të shteteve tjera, nuk duhet të ketë kombinimin e ngjyrave kuq e zi. Harta është përdor edhe më herët, në logo që e kanë përfaqësuar Kosovën. Ngjyra e Hartës është e artë, jo e verdhë e që përfaqëson Kosovën si vend i pasur. Ndërsa yjet i përfaqësojnë komunitetet që jetojnë në Kosovë”, ka shpjeguar ai.

Ndonëse si shtet, Kosova u pavarësua vonë, sipas kreatorit, shqiptarët e Kosovës gjithmonë ishin një me simbolet e Shqipërisë.

Andaj ai thotë se komentet për krijimin e tij ishin të shumta, qoftë negative apo edhe pozitive.

“Komente ka pasur prej më të ndryshmeve, ka pas prej më ekstremeve që kanë thënë na e prishe flamurin por ka pas edhe pozitive që kanë treguar se janë gëzuar për flamurin e ri, për fillimin e një ardhmërie të re”, ka deklaruar Ibrahimi.

Ideatori përshkruan ndjenjat që ka për çdo përvjetor të shpalljes së pavarësisë, e ajo që e veçon është krenaria.

“Nuk ka ndjenjë më të veçantë e ndjenjë që më ka bë me u ndje krenar mua dhe të gjithë ata që më njohin. Emocionet sa herë që vjen dita e shpalljes së Kosovës ose sa herë që e shoh flamurin duke valuar në gara ndërkombëtare gjithmonë më kujtohen ato ditë.”

Krenarinë ai e sheh edhe në sytë e familjarëve të tij, për të cilët thotë se ndihen të lumtur sidomos gjatë prezantimeve të shtetit në vendet e huaja.

Zhvillimin e shtetit përgjatë këtyre viteve, kreatori e sheh të stagnuar, megjithatë, thotë se është optimist për arritjet që mund të realizohen.

“Për sa ja ka vlejtur, nuk ka ndjenjë më të veçantë e nuk ka asgjë më të vlefshme. Ndryshimet ose përparimet e Kosovës pa marrë parasysh ato dritëhijet, stagnimet, kemi arrit deri diku. A jemi të kënaqur? Jo! Mirëpo Kosova ka arritje të ndryshme në aspektin kulturorë, në aspektin sportiv, në atë ekonomik e politik kemi stagnuar pak mirëpo në aspektet e tjera ka arritje”, ka thënë Ibrahimi.

Flamuri i Kosovës është elementi kryesor i zbukurimit të qyteteve në çdo përvjetor të shpalljes së pavarësisë.