Kryeministri i Shqipërisë, Edi Rama, e ka falënderuar kancelarin gjerman Olaf Scholz për “ripërtëritjen” e Procesit të Berlinit, duke thënë se është platforma kryesore për bashkëpunim në Ballkanin Perëndimor. Rama ishte inicues i një nisme tjetër, asaj të "Ballkanit të Hapur", por që s'pati shumë sukses.
Me rastin e Kongresit të Partisë Socialdemokrate në Gjermani, Rama ka thënë se Procesi i Berlinit është vetëm një nga sukseset e Scholzit në Ballkan, duke shtuar se Shqipëria do të mbetet e përkushtuar ndaj atij procesi.
“Me rastin e Kongresit të SPD-së në Berlin, falënderoj sinqerisht kancelarin Olaf Scholz për udhëheqjen e tij. Ripërtëritja e Procesit të Berlinit është vetëm një nga shumë sukseset e miqve dhe aleatëve tanë në Berlin. Shqipëria do të mbetet thellësisht e përkushtuar ndaj këtij procesi si platforma kryesore për bashkëpunimin e nivelit të lartë në Ballkanin Perëndimor”, ka shkruar Rama në “X”, që njihej më parë si Twitter.
Pjesë e Kongresit është edhe kryeministri i Kosovës, Albin Kurti, që u takua me kancelarin Olaf Scholz të shtunën.
Rama bashkë me presidentin e Serbisë, Aleksandar Vuçiq, kishin marrë iniciativë për nismën “Ballkani i Hapur”. Por mungesa e gjithëpërfshirjes nga shtetet e Ballkanit Perëndimor, me Kosovën që refuzoi të jetë pjesë e saj, dhe zbehjen e asaj nisme, tashmë sytë janë kthyer kah Procesi i Berlinit.
Shqipëria ishte nikoqire e fundit e Procesit të Berlinit që u mbajt muajin e kaluar.
On the occasion of the SPD Congress in Berlin, I sincerely thank @Bundeskanzler Olaf Scholz for his leadership? The rejuvenated Berlin Process is just one of many successes of our friends and allies in Berlin. Albania will remain deeply committed to this process as the principal…
— Edi Rama (@ediramaal) December 9, 2023
