Agjencia e Kosovës për Produkte e Pajisje Medicinale (AKPPM) ka marrë vendim që të heqë nga tregu ampulat Omeprazol 40 mg, nën dyshimin se ato u kanë shkaktuar reaksione disa pacientëve në QKMF të Prishtinës.
Në vendimin, të siguruar nga KOHA, AKPPM-ja ka urdhëruar mbajtësin e Autorizim Marketingut të këtij produkti dhe përfaqësuesin zyrtar të saj në Kosovë, që ta tërheqin nga tregu produktin Omeprazol 40 mg, të prodhuar në Indi me numër serik 2122324, brenda 72 orëve.
“Pas informatave nga QKMF ePrishtinës më datën 16 maj, në lidhje me shqetësimet e disa pacientëve, ku kanë pasur reaksione gjatë dhe pas marrjes së infuzioneve në njësitë e QKMF-së. Reaksione kanë qenë ethe, cianozë, pulsi i shpejtuar, dridhje, vjellje dhe dyshimet e para janë që janë shkaktuar nga Omeprazol 40 mg”, thuhet në arsyetimin e AKPPM-së për tërheqjen e produktit nga tregu.
Mbajtësi i Autorizim Marketingut të këtij produkti është obliguar që në importin e serisë së radhës të sjellë fillimisht mostrat e produktit për kontroll të rregullt medicinal, para se ta plasojë atë në treg.
Drejtori i QKMF-së së Prishtinës, Bujar Gashi, në një përgjigje për KOHËN, ka thënë se bëhet fjalë për tri raste që kanë ndodhur javën e kaluar.
“I kemi tri raste që kanë ndodhur javën e kaluar, ku pacientëve u janë shfaqur skuqje e simptoma tjera. Rastet janë trajtuar, nuk ka pasur diçka serioze. Ampulat janë marrë në QMF, mirëpo ende nuk dihet në çfarë kombinimesh të barnave kanë ndodhur këto reaksione. Janë informuar institucionet gjegjëse për këtë”, ka thënë Gashi.
Drejtori i Shëndetësisë në Komunën e Prishtinës, Izet Sadiku, ka konfirmuar rastin për KOHËN. Ai ka thënë se rasti ka ndodhur katër ditë më parë.
